तुम्ही मला कितीही दाबण्याचा आणि अडवण्याचा प्रयत्न करा मी थांबणार नाही, ये तो बस झाकी हे उद्धव ठाकरे अभी बाकी हे, रोक सको तो रोक लो, अशी प्रतिक्रिया भाजपचे माजी खा.किरीट सोमय्या यांनी दिली आहे. काळ सोमय्या यांना कोल्हापूर जिल्ह्यात न येण्याची नोटीस दिली असताना सुद्धा सोमय्या रात्री महालक्ष्मी एक्सप्रेसने कोल्हापूर साठी रवाना झाले होते. त्यांना कराड येथे अडवण्यात आले, त्यानंतर घेतलेल्या पत्रकार परिषदेत ते बोलत होते.
कराडमध्ये पोलिसांनी रेल्वेतून उतरवले आणि सोमय्यांनी तिथेच आज सकाळी पत्रकार परिषद घेत ठाकरे सरकारवर कडाडून हल्ला चढवला. मुख्यमंत्री उद्धव ठाकरे, उपमुख्यमंत्री अजित पवार, राष्ट्रवादी काँग्रेसचे अध्यक्ष शरद पवार, ग्रामविकास मंत्री हसन मुश्रीफ आणि गृहमंत्री दिलीप वळसे पाटील यांच्यावर किरीट सोमय्यांनी कडाडून हल्ला चढवला. येत्या गुरुवारी पारनेर साखर कारखान्याला भेट देणार असून 27 तारखेला उद्धव ठाकरेंच्या 19 बंगल्यांचा घोटाळ्यांची पाहणी करणार असून उपमुख्यमंत्री अजित पवार यांच्याशी संबंधित असलेल्या जरंडेश्वर सहकारी साखर कारखान्याची पाहणी करण्यास जाणार असून अडवून दाखवा, असं आव्हान किरीट सोमय्यांनी दिलं आहे.
