मनमाड शहरातील आझाद रोड येथील व्यापारी बांधवानी गेल्या पाच महिन्यापासुन अर्धवट अवस्थेत बंद पडलेल्या रस्त्याचे काम पुर्ण करण्यात यावे यासाठी प्रशासनास निवेदन दिले.
शहरातील आझाद रोड परिसर हा मुख्य बाजारपेठ असणारा परिसर असल्याने येथे ग्राहकांची आणि नागरिकांची नेहेमी वर्दळ असते , गेल्या सप्टेंबर महिन्यापासुन येथील रस्त्याचे काम हे अर्धवट अवस्थेत असुन जुना रस्ता फोडण्यात आलेला आहे. यामुळे येथील व्यापारी वर्ग , ग्राहक , जेष्ठ नागरिक , महिला वर्ग , वाहन चालक यांना खुप मोठ्या प्रमाणावर अडचणींचा सामना करावा लागत असुन , फोडलेल्या रस्त्यामुळे संपुर्ण परिसरात धुळीचे साम्राज्य होत असते , याचा परिणाम येथील व्यवसायावर आणि व्यावसायिकांच्या आरोग्यावर होत आहे. तसेच रोज येथे मोठया प्रमाणावर वाहतूक कोंडी होत असुन भविष्यात येथे मोठा अपघात देखील होऊ शकतो , तरी लवकरात लवकर या निवेदनाची दखल घेऊन अर्धवट अवस्थेतील रस्त्याचे काम लवकर सुरू करण्यात यावे अशा प्रकारचे निवेदन आझाद रोड येथील व्यापारी वर्गाकडून देण्यात आले.
