नांदूर येथील २२ वर्षीय तरुणाचा खून,हातपाय बांधत नाग्या साक्या धरणात फेकले ;दोन संशयितांना पोलिसांनी केली शिताफीने अटक

नांदगाव (सोमनाथ घोंगाणे) : नांदगाव तालुक्यातील नांदूर येथील अमोल धोंडीराम व्हडगर (२२) यांचा गळा व हातपाय दोराने बांधून नाग्या साक्या धरणात फेकून देवून खून करण्यात आला असून पोलिसांनी संशयीत आरोपीचा शोध घेवून अटक केली आहे.
याबाबत पोलिस सूत्रांनी दिलेल्या माहितीनुसार मयत अमोल व्हडगर यांचे बंधू राजेंद्र व्हडगर यांनी दिलेल्या फिर्यादीनुसार नांदूर अमोल व्हडगर (वय २२ ) हा गावातील केसकर यांच्याकडे असलेल्या वरातीत नाचून येतो, असे सांगून रविवारी (दि. २२) रात्री १०:३० वाजता घरातून गेला होता. मात्र, त्यानंतर तो घरी परतलाच नाही. अमोलच्या नातेवाइकांनी दोन दिवस शोध घेऊन मंगळवारी सकाळी नांदगाव पोलिसात हरवल्याबाबत फिर्याद दाखल केली होती. पोलिसांनी याबाबत तपास सुरू केला असताना  मंगळवारी (दि. २४) दुपारी नाग्या साक्या धरणातील सांडव्याजवळ मृतदेह तरंगत असल्याचे काही नागरिकांच्या निदर्शनास आल्याने ही बाब उघडकीस आली . या घटनेनंतर पोलिसांनी तत्काळ तपासाची चक्रे फिरवित सोनू साहेबराव केसकर(२२)गोविंदा वाळू  केसकर(२७) रा.नांदूर( ता.नांदगाव) या  संशयीतांना अटक केली असून मनमाड येथील पोलीस उपविभागीय अधिकारी समरसिंह साळवे,  पोलीस निरीक्षक रामेश्वर गाडे यांच्या मार्गदर्शनाखाली सहायक पोलीस निरीक्षक दिपक सुरवाडकर पीएसआय मनोज वाघमारे,पो.ह.सावकारे, दिपक मुढे,सागर कुमावत आदी तपास करीत आहेत..