राज्यात सत्तांतर झाल्यानंतर या सरकारच्या दुस-या मंत्रिमंडळ विस्ताराला सातत्याने तारीख पे तारीखच मिळत असल्याचे पाहायला मिळत असून सूत्रांकडून आलेल्या माहिती नुसार महाराष्ट्रातील शिंदे फडणवीस सरकारच्या मंत्रिमंडळ विस्ताराला अखेर मुहुर्त मिळाला आहे.
राज्याचे हिवाळी अधिवेशन संपल्यानंतर जानेवारी महिन्यात राज्य मंत्रिमंडळ विस्तार होणार असल्याची माहिती समोर आली आहे. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी केंद्रीय गृहमंत्री अमित शाह यांची भेट घेतली. त्यावेळी या मंत्र्यांमध्ये मंत्रिमंडळ विस्तारावर चर्चा झाली असून अमित शहा यांनी मंत्रिमंडळ विस्तारास हिरवा कंदील दर्शविला आहे. त्यामुळे लवकरच मंत्रिमंडळाचा विस्तार होणार असल्याचं सूत्रांनी सांगितलं आहे.
सूत्रांनी दिलेल्या माहितीनुसार नवीन वर्षात जानेवारी अखेरपर्यंत राज्य मंत्रिमंडळाचा विस्तार होऊ शकतो. परंतु नव्या मंत्रिमंडळ विस्तारात किती मंत्र्यांना स्थान देणार याबाबतची माहिती गुलदस्त्यात आहे. तसेच भाजप आणि शिंदे गटाच्या वाट्याला किती आणि कोणते मंत्रिपदे येणार याचीही माहिती देण्यात आलेली नाही.
