नाशिक रोड : येथील सराफ व्यावसायिकाने मुंबई पोलिसांच्या जाचाला कंटाळून आत्महत्या केल्याची घटना समोर आली आहे. चोरीचे सोने घेतल्याचा आरोप पोलिसांनी या सराफावर केला होता. या घटनने परिसरात खळबळ माजली आहे. याबाबत सविस्तर वृत्त असे.
येथील रहिवासी असलेले सराफ व्यवसायिक दीपक कमलाकर दुसाने यांचे परिसरातील देवी चौकात दुसाने बंधु नावाने दुकान आहे. उल्हासनगर येथील पोलिसांनी वारंवार चोरीचे सोने घेतल्याचा आरोप करत त्रास दिल्याने त्यांनी राहत्या घरी आत्महत्या केली अशी माहिती मृत दीपक दुसाने यांचे काका कालिदास दुसाने यांनी माध्यमांशी बोलताना दिली.
कालिदास दुसाने यांनी माध्यमांना सांगितले कि, २३ तारखेला दीपक यांच्या दुकानात ठाणे येथून पोलिस आले व त्यांनी दीपक यांच्यावर चोरीचे सोने घेतल्याचा आरोप केला. व त्याची भरपाई म्हणून २ लाख ९० हजार रोख तर १२ ग्रॅम सोन्याची मागणी केली. मात्र हे पैसे त्यांनी दुकानात न घेता परिसरातील बिटको पॉईंट येथे घेतले व कुठल्याही प्रकारचे लेखी कागदपत्र दिले नाहीत. त्यांच्या या जाचाला कंटाळून माझ्या पुतण्याने आत्महत्या केली. त्यामुळे संबंधीतांवर कारवाई करण्यात यावी अशी मागणी दीपक दुसाने यांचे काका कालिदास दुसाने यांनी केली आहे.
या घटनेचे वृत्त समजात त्यांचे नातेवाईक, मित्र व सराफी संघटनेच्या पदाधिकाऱ्यांनी बिटको हॉस्पिटल येथे धाव घेतली. शवविच्छेदनानंतर आरोपींना शिक्षा झाल्याशिवाय मृतदेह ताब्यात घेण्यास विरोध केला. उपनगर पोलिस ठाण्याचे वरिष्ठ पोलिस निरीक्षक निलेश माईनकर, नाशिक रोड पोलिस ठाण्यातील गुन्हे शाखेच्या योगेश पाटील घटनास्थळी धाव घेत उपस्थितांची समजुत काढत मृतदेह ताब्यात घेण्याची विनंती केली.
