नाशिक जिल्हा बॉडीबिल्डिंग असोसिएशनच्या मान्यतेने नाशिक येथे हबीब क्लबतर्फे घेण्यात आलेल्या नाशिक श्री मास्टर या जिल्हास्तरीय स्पर्धेत मनमाडच्या मुश्ताक शेखने अजिंक्यपद पटकावले. त्यामुळे एक तपानंतर नाशिक श्री किताब मनमाडला मिळाला आहे. या कामगिरीबद्दल मुश्ताकचे मनमाड शहरासह नांदगाव तालुक्यात कौतुक होत आहे.
नाशिक जिल्हा बॉडीबिल्डिंग असोसिएशन व हबीब क्लब यांच्या संयुक्त विद्यमाने ही स्पर्धा झाली. शेख हे भूमी अभिलेख कार्यालयात कार्यरत असून, त्यांनी या आधीही अनेक किताब मिळविले आहेत. दिवसभर सरकारी कार्यालयात कर्मचारी म्हणून काम केल्यानंतर रात्रीच्या वेळी आपल्या शरीराला वेळ देऊन व्यायाम करत मोठ्या मेहनतीने त्यांनी आपले शरीर बनविलेले आहे. नाशिक जिल्ह्यासह राज्यभरात तसेच इतर राज्यातही मुश्ताक यांनी अनेक बॉडीबिल्डिंग स्पर्धांमध्ये यश मिळविले आहे.
नाशिक येथे पार पडलेल्या या स्पर्धेत श्री मास्टर या किताबासाठी जवळपास १८ स्पर्धक सहभागी झाले होते. या सर्वांना मागे टाकत मुश्ताकने यश संपादन केले. दरम्यान, यापुढेही मेहनत सुरू ठेवून राज्यस्तरावर खेळण्यासाठी तसेच इतर तरुणांना बॉडीबिल्डिंग स्पर्धेसाठी तयार करणार असल्याचा निर्धार शेख यांनी व्यक्त केला आहे.
