मुख्यमंत्र्यांचे अत्यंत विश्वासू म्हणून ओळखले जाणारे मनमाड नांदगाव चे आमदार सुहास कांदे यांनी मुख्यमंत्री एकनाथ शिंदे यांच्या सोमवारी (ता. १३) मनमाड दौऱ्याची जय्यत तयारी केली आहे. मनमाडसाठी जीवनदायी असलेल्या करंजवन जलवाहिनी योजनेचे भूमिपूजन मुख्यमंत्र्यांच्या हस्ते होणार आहे. त्यासाठी महर्षी वाल्मीकी मैदानावर सभामंडप उभारण्यात येत आहे. आमदार सुहास कांदे यांच्यासह अंजूम कांदे, फरहान खान तसेच बाळासाहेबांच्या शिवसेनेचे प्रमुख पदाधिकारी कार्यक्रमाच्या नियोजनामध्ये व्यस्त आहेत. शिंदे-फडणवीस युती सरकार राज्यात अस्तित्वात आल्यानंतर मुख्यमंत्री एकनाथ शिंदे दुसऱ्यांदा मनमाड दौऱ्यावर येत आहेत. या कार्यक्रमासाठी पालकमंत्री दादा भुसे, पाणीपुरवठा मंत्री गुलाबराव पाटील, आरोग्य व कुटुंबकल्याण मंत्री तानाजी सावंत, उद्योगमंत्री उदय सामंत, केंद्रीय आरोग्य राज्यमंत्री डॉ. भारती पवार, बाळासाहेबांची शिवसेनेचे राज्य सचिव भाऊसाहेब चौधरी, खासदार डॉ. श्रीकांत शिंदे आदी उपस्थित राहणार आहे. मुख्यमंत्र्यांच्या दौऱ्यानिमित्त पोलिस प्रशासनाकडून देखील बंदोबस्ताची तयारी केली जात आहे.
