मनमाड महाविद्यालयात शिक्षकेतर कर्मचाऱ्यांचा बेमुदत संप

मनमाड : अकृषी विद्यापीठीय व महाविद्यालयीन शिक्षकेतर कर्मचाऱ्यांच्या प्रलंबित मागण्यांसाठी येथील महात्मा गांधी विद्यामंदिर संचालित कला, विज्ञान आणि वाणिज्य महाविद्यालयातील शिक्षकेतर कर्मचाऱ्यांनी प्रवेशद्वारासमोर बेमुदत कामबंद आंदोलन सुरू केले आहे. या कर्मचाऱ्यांनी १२ वी परीक्षेच्या कामकाजावर बहिष्कार टाकला आहे. महाराष्ट्र राज्य महाविद्यालयीन शिक्षकेतर कर्मचारी संघटनेचे अध्यक्ष संजय देसले यांच्या नेतृत्वाखाली संघटनेच्या माध्यमातून महाराष्ट्रातील अकृषी विद्यापीठीय व महाविद्यालयीन शिक्षकेतर कर्मचाऱ्यांच्या प्रलंबित मागण्यांसाठी आंदोलन सुरू करण्यात आले आहे. सोमवारी (दि. २०) पासून निदर्शने, कामबंद आंदोलन केल्यानंतरही मागण्यांची पूर्तता झालेली नसल्यामुळे बेमुदत संपाला सुरुवात करण्यात आली आहे. सेवांतर्गत सुधारित आश्वासित प्रगती योजनेचा रद्द केलेला शासन निर्णय पुनरुज्जीवित करून सुधारित सेवांतर्गत आश्वासित प्रगती योजना पूर्ववत लागू करावी, सातव्या वेतन आयोगातील तरतुदीनुसार १०, २०, ३० वर्षांनंतरच्या लाभाची योजना विद्यापीठीय व महाविद्यालयीन शिक्षकेतर कर्मचाऱ्यांना लागू करावी, सातव्या वेतन आयोगापासून वंचित असलेल्या एक हजार ४१० विद्यापीठीय शिक्षकेतर कर्मचाऱ्यांना १ जानेवारी २०१६ ते प्रत्यक्ष सातवा वेतन लागू झालेल्या कालावधीतील वेतनाच्या फरकाची थकबाकी अदा करावी, तसेच विद्यापीठ, महाविद्यालयीन शिक्षकेतर कर्मचाऱ्यांची रिक्त पदे भरण्यास मान्यता द्यावी, अशा विविध मागण्या असून, या आंदोलनात येथील महाविद्यालयीन शिक्षकेतर कर्मचारी संघटनेचे प्रशांत सानप, चंद्रशेखर गाणी, उमेश भोये, हेमचंद्र आडसुळे, कैलास शिंदे, अशोक सोनवणे, बापू ताडगे, किशोर आहेर आदींसह सर्व शिक्षकेतर कर्मचारी सहभागी झाले आहेत.