मनमाड (नाशिक) – महात्मा गांधी विद्यामंदिर संचालित, कला, विज्ञान व वाणिज्य महाविद्यालयात ‘मराठी वाचन कट्ट्या’चे उद्घाटन करताना महाविद्यालयाचे प्राचार्य डॉ. अरुण पाटील यांनी वरील विधान केले. ते पुढे असेही म्हणाले की, विद्यार्थ्यांनी शैक्षणिक अभ्यासक्रमाला अवांतर वाचनाची मजबूत जोड द्यायला हवी. याच उद्देशाने महाविद्यालयात ‘मराठी वाचन कट्टा’ सुरू करण्यात आला आहे. या उपक्रमांतर्गत विद्यार्थ्यांना आपल्या आवडीची पुस्तके, मासिके व वर्तमानपत्रे वाचायला मिळणार आहे. पुस्तके माणसाला समृद्ध करतात. त्यामुळे विद्यार्थ्यांनी पुस्तकांशी मैत्री करणे आवश्यक आहे. महाविद्यालयातील ग्रीन जिममध्ये हा वाचन कट्टा सुरु करण्यात आला असून या अभिनव उपक्रमाचा विद्यार्थ्यांना नक्कीच फायदा होईल असा विश्वासही त्यांनी व्यक्त केला.
महाविद्यालयातील मराठी विभाग व संशोधन केंद्र आणि ग्रंथालय विभाग यांच्या संयुक्त विद्यमाने मराठी भाषा संवर्धन पंधरवडा या उपक्रमाचे औचित्य साधत हा ‘मराठी वाचन कट्टा’ सुरु करण्यात आला.
कार्यक्रमाच्या प्रास्ताविकात मराठी विभाग प्रमुख प्रा. (डॉ.) किरण पिंगळे यांनी वाचन कट्टा सुरु करण्यामागील भूमिका सांगितली. या उपक्रमांतर्गत साहित्य चर्चा, विचारांची देवाण-घेवाण, संवाद, समीक्षा, कथा कथन, कादंबरी वाचन, कविता वाचन आदि अनेक विषयांवर मंथन होणार आहे. विद्यार्थ्यांमध्ये वाचनाची गोडी वाढण्यासाठी हा उपक्रम निश्चितच उपयोगी ठरणार आहे.
कार्यक्रमाचे सूत्रसंचालन उपक्रम समन्वयक प्रा. सोमनाथ पावडे यांनी केले तर आभार ग्रंथपाल डॉ. आर. एस. लोखंडे यांनी मानले.
या प्रसंगी उपप्राचार्य प्रा. (डॉ.) बी. एस. देसले, शैक्षणिक पर्यवेक्षक प्रा. डी. व्ही. सोनवणे, कुलसचिव समाधान केदारे, सर्व विभागप्रमुख, प्राध्यापक, शिक्षकेतर कर्मचारी व विद्यार्थी मोठ्या संख्येने उपस्थित होते.
