मनमाड : (प्रतिनिधी)
नांदगाव–मनमाड मराठी पत्रकार संघाची वार्षिक सर्वसाधारण सभा जनश्रद्धा कार्यालयात अत्यंत खेळीमेळीच्या वातावरणात पार पडली. सभेच्या अध्यक्षस्थानी ज्येष्ठ पत्रकार नरेश गुजराथी होते.
सभेस संघाचे संस्थापक अमोल खरे, तालुकाध्यक्ष संदीप जेजुरकर, सरचिटणीस निलेश वाघ, ज्येष्ठ पत्रकार अशोक परदेशी, नरहरी उंबरे, मारुती जगधने, जहूर खान, सतीश शेकदार यांच्यासह अनेक पत्रकार सदस्य उपस्थित होते.9
सभेच्या प्रारंभी कार्याध्यक्ष उपाली परदेशी यांनी मागील सभेचे इतिवृत्त व जमाखर्च सभेपुढे सादर केला. यावर उपस्थित सदस्यांनी चर्चा करून सदर इतिवृत्त व जमाखर्च अहवालास सर्वानुमते मंजुरी दिली.
त्यानंतर संघामार्फत मागील वर्षात राबविण्यात आलेले विविध उपक्रम, बैठका व आंदोलने यांचा सविस्तर आढावा घेण्यात आला. सभेत आयत्यावेळी आलेल्या विषयांवरही चर्चा करण्यात आली.
संघाच्या सदस्यांच्या दिवंगत नातेवाईकांना सभेत श्रद्धांजली अर्पण करण्यात आली. तसेच मनमाड व नांदगाव नगरपरिषदेत नवनियुक्त नगराध्यक्ष व नगरसेवक, संघाच्या सदस्यांना मिळालेल्या नियुक्त्या, पुरस्कार तसेच त्यांच्या पाल्यांच्या शैक्षणिक यशाबद्दल अभिनंदनाचे ठराव मंजूर करण्यात आले. यावेळी काही सदस्यांचा सत्कारही करण्यात आला.
संघाच्या कार्यपद्धतीबाबत सदस्यांनी समाधान व्यक्त करत भविष्यातील उपक्रम अधिक प्रभावीपणे राबविण्याबाबत सूचना मांडल्या. सर्व पत्रकार सदस्यांनी मनोगत व्यक्त करून संघाच्या कार्याचे कौतुक केले व पुढील वाटचालीसाठी उपयुक्त सूचना दिल्या.
येत्या ६ जानेवारी रोजी पत्रकार दिनानिमित्त नांदगाव येथे विशेष कार्यक्रम आयोजित करण्यात येणार असल्याची माहिती देण्यात आली. तसेच संघाचे कार्य अधिक प्रभावीपणे राबविण्यासाठी नांदगाव–मनमाड समिती गठीत करण्याचा निर्णय घेण्यात आला.
सभेचे अध्यक्ष नरेश गुजराथी यांनी अध्यक्षीय भाषणात पत्रकार संघाची एकजूट, सामाजिक बांधिलकी आणि पत्रकारांच्या प्रश्नांवर संघाने कायम ठाम भूमिका घ्यावी, असे मार्गदर्शन केले.
सभेचे सूत्रसंचालन उपाली परदेशी यांनी केले तर अशोक बिदरी यांनी आभार मानले. यावेळी अनिल निरभवणे, प्रमित आहेर, तुषार गोयल, बाबासाहेब बोरसे, गणेश केदारे, रुपाली केदारे, राजू लहिरे, बापू मार्कंड, मिलिंद वाघ, योगेश म्हस्के, आनंद बोथरा, रामदास सोनवणे, राजेंद्र धिंगाण, प्रणव हरकल, पंकज जाधव, विनायक कदम आदी पत्रकार सदस्य मोठ्या संख्येने उपस्थित होते.
