अखिल भारतीय मराठी पत्रकार परिषदेच्या वतीने देण्यात येणारा प्रतिष्ठेचा “वसंतराव काणे आदर्श तालुका पत्रकार संघ” पुरस्कार कर्जत येथे नांदगाव–मनमाड मराठी पत्रकार संघाला प्रदान करण्यात आला.
पत्रकारितेतील प्रामाणिकपणा, सामाजिक बांधिलकी आणि सातत्यपूर्ण कार्याची दखल घेत हा सन्मान प्रदान करण्यात आला. पुरस्कार स्वीकारण्यासाठी पत्रकार संघाचे संस्थापक अध्यक्ष अमोल खरे, उपाध्यक्ष नरहरी उंबरे, सरचिटणीस निलेश वाघ, कार्याध्यक्ष उपाली परदेशी, संघटक अशोक बिदरी व सदस्य गणेश केदारे उपस्थित होते.
यावेळी अध्यक्ष अमोल खरे यांनी सांगितले की, “हा पुरस्कार नांदगाव–मनमाड मराठी पत्रकार संघाच्या सर्व पदाधिकाऱ्यांच्या आणि सदस्यांच्या सामूहिक कार्याचा गौरव आहे.
कर्जत येथे आयोजित राज्यस्तरीय पत्रकार संघ पुरस्कार सोहळा मोठ्या उत्साहात पार पडला. कार्यक्रमात प्रमुख पाहुणे ज्येष्ठ पत्रकार हेमंत देसाई यांनी पत्रकारांनी शोध पत्रकारिता अखंड चालू ठेवण्याचे आवाहन केले. “नवीन तंत्रज्ञान आत्मसात करून पत्रकारांनी आपली भूमिका अधिक सक्षम करावी. पत्रकारांच्या प्रश्नांसाठी मराठी पत्रकार परिषदेचे योगदान भरीव असून मुख्य विश्वस्त एस. एम. देशमुख यांचे प्रयत्न अफाट आहेत,” असे त्यांनी नमूद केले.
यंदा “पत्रमहर्षी रंगाअण्णा वैद्य आदर्श जिल्हा पत्रकार संघ” हा पुरस्कार परभणी जिल्हा पत्रकार संघाला प्रदान करण्यात आला, तर “वसंतराव काणे आदर्श तालुका पत्रकार संघ” पुरस्कार नांदगाव–मनमाड मराठी पत्रकार संघाला मान्यवरांच्या हस्ते देण्यात आला.
या सोहळ्यास खासदार श्रीरंग बारणे, आमदार महेंद्र थोरवे, मराठी पत्रकार परिषदेचे मुख्य विश्वस्त एस. एम. देशमुख, विश्वस्त किरण नाईक, शरद पाबळे, अध्यक्ष मिलिंद आष्टीवकर, न्यूज 18 मराठीचे संपादक मंदार फणसे, वृत्तनिवेदक विशाल परदेशी आदी मान्यवर उपस्थित होते.
मराठी पत्रकार परिषदेचे पुढील अधिवेशन एप्रिल महिन्यात उदगीर तालुक्यात आयोजित करण्यात येणार असल्याची माहिती यावेळी देण्यात आली.
