सप्टेंबर महिनाअखेरीस बँक ग्राहकांना सलग पाच दिवस प्रत्यक्ष शाखा व्यवहारांपासून दूर राहावे लागणार आहे. युनायटेड फोरम ऑफ बँक युनियन्सने २८ ते ३० सप्टेंबरपर्यंत तीन दिवसांचा देशव्यापी संप पुकारला आहे. त्याआधी २६ सप्टेंबरला चौथा शनिवार आणि २७ सप्टेंबरला रविवार असल्याने २६ ते ३० सप्टेंबरदरम्यान शाखांमधील बँकिंग सेवा सलग पाच दिवस प्रभावित होणार आहेत.
आठवड्यात पाच दिवस बँकिंग लागू करण्याची व परफॉर्मन्स लिंक्ड इन्सेंटिव्ह योजनेबाबत संघटनांनी भूमिका घेतली होती. केंद्राने ही योजना तुर्तास स्थगित ठेवल्याचे सांगत, उर्वरित प्रश्न चर्चेतून सोडवण्याचे आवाहन केले आहे. मात्र, संपावर संघटना ठाम आहेत. ३० सप्टेंबर हा बँकांचा आर्थिक सहामाहीअखेरीचा व्यवहार, ताळेबंद आणि अन्य आर्थिक प्रक्रिया महत्त्वाच्या असतात. त्यामुळे संपाचा परिणाम व्यावसायिक व्यवहारांवरही होऊ शकतो, अशी केंद्र सरकारने चिंता व्यक्त केली असून बँकांचे व्यवहार ठप्प होण्याची भीती व्यक्त करण्यात येत आहे.
