फ्रान्समधील ग्रेनोबलनजीक सेंट हिलारे येथे पार पडलेल्या ५३ व्या ‘कुपेकार २०२६’ या आंतरराष्ट्रीय फ्लाईंग फेस्टिव्हलमध्ये पॅराग्लायडिंग पायलट तथा पुणे महापालिकेचे माजी पर्यावरण अधिकारी मंगेश दिघे यांनी मराठी संस्कृतीची वेगळी ओळख जागतिक पटलावर पोहोचवली. या महोत्सवात त्यांनी मराठी शेतकऱ्याच्या पारंपरिक वेशभूषेत पॅराग्लायडिंगचे यशस्वी उड्डाण केले. मंगेश दिघे हे न्यायडोंगरीचे जेष्ठ पत्रकार जगन पाटील यांचे भाचे आहेत.
१९७९ पासून दरवर्षी सप्टेंबरमध्ये आयोजित होणाऱ्या या सात दिवसीय प्रतिष्ठित महोत्सवात जगभरातील विमानांचे एरोबॅटिक्स, हेलिकॉप्टर, हँग ग्लायडर, पॅरामोटर, एरोमॉडेलिंग व हॉट एअर बलून यांची प्रात्यक्षिके सादर केली जातात. यंदा विविध देशांतील नामांकित पायलट्सच्या उपस्थितीत मंगेश दिघे यांनी धोतर, नेहरू शर्ट (झब्बा) आणि डोक्यावर मराठी फेटा अशा अस्सल पारंपरिक शेतकरी वेशात अल्प्स पर्वतरांगांवरून उड्डाण केले.
पॅराग्लायडिंगच्या तांत्रिक व सुरक्षा नियमांत कोणताही बदल न करता, हार्नेससह हेल्मेटवर बांधलेला फेटा आणि पारंपरिक पेहराव सावरत त्यांनी घेतलेली ही भरारी हजारो आंतरराष्ट्रीय प्रेक्षकांचे मुख्य आकर्षण ठरली. पर्यावरण संवर्धनानंतर साहसी क्रीडा प्रकारातही मराठी संस्कृतीचा डंका सातासमुद्रापार वाजवल्याबद्दल मंगेश दिघे यांच्या या अद्वितीय साहसाचे सर्व स्तरांतून कौतुक होत आहे.
