मध्य रेल्वेच्या मुंबई विभागातील आसनगाव-कसारा तिसऱ्या रेल्वे लाईन प्रकल्प आणि कसारा यार्डमधील ‘अप’ यार्ड लाईन विस्तारीकरणाच्या कामामुळे कसारा येथे १७ ऑक्टोबर रोजी पॉवर ब्लॉक घेण्यात येत आहे. प्री-नॉन-इंटरलॉकिंग आणि नॉन-इंटरलॉकिंगच्या या कामांचा थेट आणि मोठा फटका नाशिककर प्रवाशांना बसणार आहे. मुंबई आणि शिर्डी दरम्यान धावणारी ‘वंदे भारत’ एक्स्प्रेस या काळात रद्द राहणार असून या गाडीसह ६ गाड्या रद्द करण्यात आल्या आहेत. अनेक लांब पल्ल्याच्या गाड्यांचे वेळापत्रक कोलमडले आहे.
१६ आणि १७ ऑक्टोबर रोजी उत्तर भारत आणि पूर्व भारतातून सुटणाऱ्या अनेक गाड्या नाशिक-मनमाडमार्गे येणार नाहीत. त्या जळगाव-नेवासा-वसई रोड किंवा मनमाड-पुणे-कल्याण अशा पर्यायी मार्गावर वळवण्यात आल्या आहेत. त्या विलंबाने धावतील, ज्यामुळे नाशिक रोड स्थानकावर येणाऱ्या प्रवाशांना तासन्‌तास प्रतीक्षा करावी लागू शकते.
रद्द झालेल्या गाड्यांमुळे प्रवाशांचे होणार हाल
तांत्रिक कामामुळे मध्य रेल्वेने १७ ऑक्टोबर रोजी नाशिक व उत्तर महाराष्ट्राशी जोडलेल्या अतिमहत्त्वाच्या गाड्या पूर्णपणे रद्द केल्या आहेत. यात मुंबई-शिर्डी वंदे भारत, मनमाड-मुंबई एक्स्प्रेस आणि मुंबई-धुळे एक्स्प्रेसचा समावेश आहे. याशिवाय मुंबई-अमरावती, मुंबई-नागपूर आणि मुंबई-बल्हारशाह गाड्याही या काळात बंद राहणार असल्याने प्रवाशांची मोठी कोंडी होणार आहे.
नाशिकरोड स्टेशनवरच ‘वंदे भारत’ थांबवणार
मेगाब्लॉकमुळे नांदेड-मुंबई वंदे भारत गाडी १७ ऑक्टोबरला थेट मुंबईला न जाता नाशिक रोड स्थानकावरच थांबविण्यात येईल. परतीची मुंबई-नांदेड वंदे भारत मुंबईऐवजी नाशिक रोडवरूनच सुटेल.
तसेच मनमाड मार्गे धावणाऱ्या जनशताब्दी आणि नांदेड एक्स्प्रेस मनमाडपर्यंतच धावतील. त्यामुळे नाशिक रोड स्थानकावरून प्रवास करणाऱ्या प्रवाशांचे मोठे हाल होण्याची शक्यता वर्तवली जात आहे.
