मनमाड (प्रतिनिधी) :- मनमाड शहरातून जाणाऱ्या इंदूर-पुणे महामार्गावर होणाऱ्या अपघातांची मालिका सुरूच असून, पुन्हा एकदा आज एक भीषण आणि दुर्दैवी अपघात घडला आहे. या संदर्भातील अधिक माहिती अशी की कैंप विभागात असणाऱ्या संत बार्नंबा शाळेसमोर आयशर ट्रकखाली सापडल्याने एका १९ वर्षीय तरुणीचा जागीच मृत्यू झाला, तर तिच्यासोबत असलेला पाच वर्षांचा चिमुरडा गंभीर जखमी झाला आहे. सातत्याने वाहतुकीची कोंडी होऊन अपघात घडण्याचे प्रकार आता मनमाडकरांना नित्याचेच झाले असून या घटनेमुळे मनमाड शहरात तीव्र संताप आणि हळहळ व्यक्त केली जात आहे. कोमल पगारे असे मृत तरुणीचे नाव आहे.
आज (बुधवारी) पुण्याकडून मालेगावकडे जाणाऱ्या एका आयशर ट्रक (क्रमांक : UP 25 FT 2249) समोर अचानक कोमल पगारे ही तरुणी आली. वाहनचालकाने तातडीने ब्रेक लावून तिला वाचवण्याचा आटोकाट प्रयत्न केला; मात्र वेगातील ट्रकवर नियंत्रण मिळवणे कठीण झाले.
हा अपघात इतका भीषण होता की, कोमल ही ट्रकखाली तब्बल ५० ते ६० फूट फरफटत गेली. गंभीर दुखापत झाल्याने तिचा जागीच दुर्दैवी मृत्यू झाला. अपघाताच्या वेळी कोमलसोबत असलेला पाच वर्षांचा लहान बालकही गंभीर जखमी झाला आहे. अपघात घडताच स्थानिक नागरिकांनी घटनास्थळाकडे धाव घेतली आणि तातडीने मदतकार्य सुरू केले. नागरिकांनी जखमी बालकाला तात्काळ मनमाडच्या उपजिल्हा रुग्णालयात उपचारासाठी दाखल केले. घटनेची माहिती मिळताच मनमाड पोलिसांनी तातडीने घटनास्थळी धाव घेत पंचनामा केला आणि वाहतूक कोंडी सुरळीत केली.
हा महामार्ग सध्या वाहनधारकांसाठी आणि पादचाऱ्यांसाठी मृत्यूचा सापळा बनला आहे. अपघाताच्या वाढत्या घटनांमुळे नागरिकांमध्ये संताप व्यक्त होत आहे.
अपघात घडलेल्या भागात संत बार्णाबा शाळा असून विद्यार्थ्यांची आणि नागरिकांची येथे सतत वर्दळ असते. या परिसरात वाहनांचा वेग मर्यादित ठेवण्यासाठी नॅशनल हायवे अथॉरिटी (NHAI) ने तात्काळ गतिरोधक (स्पीड ब्रेकर) बसवावेत, अशी मागणी स्थानिक नागरिकांनी आक्रमकपणे केली आहे. “नॅशनल हायवे अथॉरिटी अजून किती निष्पाप नागरिकांचे बळी घेणार?” असा संतप्त सवाल जनतेकडून उपस्थित केला जात आहे.
