ज्या समाजात आपला जन्म झाला आहे, त्या समाजाचं आपण काहीतरी देण लागतो, या भावनेने मनमाड येथील आनंद बोथरा यांच्या वतीने गेल्या 10-12 वर्षांपासून मनमाड जवळील आश्रम शाळेतील विद्यार्थ्यांना दिवाळी निमित्त फराळ वाटप करण्यात येते.
यंदाही आश्रम शाळेतील विद्यार्थ्यांना फराळ वाटप करण्यात आले. कार्यक्रमाचे अध्यक्ष मनमाड बाजार समितीचे मा. सभापती दीपक गोगड हे होते. त्यांनी विद्यार्थ्यांना दिवाळीच्या तसेच भविष्य काळातील प्रगतीसाठी शुभेच्छा देत आश्रम शाळेत आवश्यक असलेल्या मदतीसाठी कायम मदत करण्याचे आश्वासन दिले. प्रमुख अतिथी म्हणून भाजप व्यापारी आघाडी जिल्हाध्यक्ष सचिन लुनावत व शहर सरचिटणीस सचिन कांबळे उपस्थित होते.
कार्यक्रम यशस्वीतेसाठी आश्रम शाळेतील शिक्षक वृंद व कर्मचारी वृंद यांनी प्रयत्न केले. कार्यक्रमाचे संयोजन आनंद बोथरा यांनी केले होते.
