मुख्यमंत्री उद्धव ठाकरे यांनी औरंगाबादमध्ये केलेल्या वक्तव्यांमुळे राज्यातील राजकारणात जोरदार उलटसुलट चर्चा सुरू झाल्या असून अनेक तर्कवितर्क लढवले जात आहेत. गुरुवारी पुण्यातील एका कार्यक्रमात भाजपचे प्रदेशाध्यक्ष चंद्रकांत पाटील यांनी, ‘मला माजी मंत्री म्हणू नका, दोन दिवसात तुम्हाला कळेल’, असे वक्तव्य करत नव्या चर्चेला तोंड फुटले होते. त्यावर प्रतिक्रिया देताना मुख्यमंत्र्यांनी चंद्रकांत पाटील यांना टोला लगावला आहे.
चंद्रकांत पाटील यांच्या वक्तव्यानंतर त्या विधानाचे वेगवेगळे अर्थ लावले जात होते. भविष्यात शिवसेना आणि भाजप एकत्र येणार का, यावरही चर्चा सुरू झाली होती. याच मुद्द्यावर मुख्यमंत्री ठाकरे यांनी घेतलेल्या पत्रकार परिषदेत त्यांना प्रश्न विचारण्यात आला. त्यावर मिश्किल उत्तर देताना मुख्यमंत्र्यांनी पाटील यांना टोला लगावला.
मला माजी मंत्री म्हणू नका, दोन दिवसात तुम्हाला कळेल, असे वक्तव्य चंद्रकांत पाटील यांनी केले आहे. त्यावर आपली प्रतिक्रिया काय आहे असे मुख्यमंत्र्यांना पत्रकार परिषदेत विचारण्यात आले. त्यावर मुख्यमंत्री उद्धव ठाकरे म्हणाले, ‘मी असे ऐकले आहे की चंद्रकांत पाटील हे आमच्या तीन पक्षांपैकी एका पक्षात येण्याचा प्रयत्न करत आहेत. चंद्रकांत पाटील यांच्या वक्तव्यावर शिवसेनेचे नेते, खासदार संजय राऊत यांनीही पाटील यांना टोले लगावले आहेत. चंद्रकांत पाटील हे नागालँडचे राज्यपाल होणार आहेत, असे माझ्या कानावर आले आहे असे सांगतानाच पाटील यांच्या वक्तव्यानंतर मी त्यांना फोन करून सांगितले की पुढचे २५ ते ३० वर्षे तुम्ही आणखी ‘माजी’च राहणार आहात, असा टोला राऊत यांनी लगावला आहे.
चंद्रकांत पाटील नेमके काय म्हणाले होते?
पिंपरी चिंचवड जवळील देहूगावमधील एक खाजगी कार्यक्र होता. या कार्यक्रमाला भाजप प्रदेशाध्यक्ष चंद्रकांत पाटील उपस्थित होते. मंचावरुन सूत्रसंचालकाने चंद्रकांत पाटील यांचा दोन-तीनवेळा माजी मंत्री चंद्रकांत पाटील असा उल्लेख केला. माजी मंत्री म्हणू नका, दोन-तीन दिवसात कळेल, असे चंद्रकांत पाटील मागे वळून म्हणाले.
