मनमाड शहरातील स्थानिक समस्यांची जाणीव करुन घेत त्यांना सोडविण्यासाठी मनमाड शहरात “जनता दरबार” आयोजित करण्यात यावा, असे निवेदन येथील जेष्ठ नागरिक संघर्ष समितीच्या वतीने तालुक्याचे आमदार सुहास कांदे यांना देण्यात आले.
मनमाड शहरातील नागरिकांना दररोज विविध समस्यांसाठी शासकीय कार्यालयांत वारंवार चकरा माराव्या लागतात, संबंधित कार्यालयातील अधिकारी, कर्मचारी मंडळी तात्पुरती उडवा-उडवीची उत्तरे देऊन वेळ मारून नेत असतात. त्यामुळे नागरिकांच्या कामात दिरंगाई होते म्हणुन तालुक्याचे पालक म्हणुन आमदारांनी “जनता दरबार” आयोजित करुन सदर समस्यांची सोडवणुक करण्याचे निवेदनात म्हटले आहे.
आमदार सुहास कांदे यांनी निवेदनास सकारात्मक प्रतिसाद देत येत्या पंधरा दिवसात तारीख ठरवण्याचे आश्वासन दिल्याचे समितीचे
अध्यक्ष राजेंद्र पारीक यांनी सांगितले. यावेळी संस्थेचे सचिव एस.एम.भाले, कार्याध्यक्ष नरेंद्र कांबळे, रामभाऊ गवळी, दिलीप आव्हाड, गोपीनाथ गायकवाड आदि उपस्थित होते.
