26 डिसेंबरपासून सुरु होणाऱ्या भारत संघाच्या दक्षिण आफ्रिका दौऱ्या अगोदरच भारताचा उपकर्णधार आणि स्टार फलंदाज रोहित शर्मा याला दुखापत झाली आहे. या दौऱ्यात भारतीय संघ आफ्रिके विरुद्ध कसोटी आणि एकदविसीय मालिका खेळणार आहे. भारतीय संघ 16 डिसेंबरला आफ्रिकेसाठी रवाना होणार आहे. त्याआधी टीम इंडियाला मोठा झटका लागला आहे. टीम इंडियाचा हुकमाच्या एक्क्याला दुखापत झाली आहे.
रोहित शर्मा मुंबईत सराव करत होता. या सरावादरम्यान त्याला ही दुखापत झाली. रोहितला झालेली दुखापत ही गंभीर स्वरुपाची आहे की नाही, याबाबत अजून काही माहिती मिळालेली नाही. ही दुखापत फार गंभीर स्वरुपाची नसावी, अशीच प्रार्थना ही रोहितच्या चाहत्यांकडून करण्यात येत आहे.
रोहितत्या दुखापतीबाबत अजून काही स्पष्ट नाही. मात्र ही दुखापत गंभीर असेल, तरीही रोहितकडे दुखापतीतून सावरण्यासाठी 2 आठवड्यांचा पुरेसा वेळ आहे. मात्र यानंतरही तो सावरला नाही, तर त्याला पहिल्या कसोटीला मुकावं लागू शकतं. रोहितच्या दुखापतीमुळे टीम मॅनेजमेंटची चिंताही काहीशा प्रमाणात वाढली आहे. रोहितचं दुखापतीतून सावरणं हे टीमसाठी महत्त्वाचं आहे. कारण रोहित कसोटी क्रिकेटमध्ये 2021 मध्ये सर्वाधिक धावा करणारा जो रुटनंतर दुसराच फलंदाज आहे.
