सालाबादाप्रमाणे चांदवड तालूक्यातील शिंगवे येथे साजरा होणारा दत्त जयंती यात्रा उत्सव सलग दुसऱ्या वर्षी कोरोना विषाणूच्या प्रादुर्भावामुळे रद्द करण्यात आला आहे. नाशिक जिल्ह्यातील प्रति गाणगापूर म्हणून ख्याती असलेले चांदवड तालुक्यातील दत्त मंदिर येथे दरवर्षी दत्त जयंती यात्रा उत्सव मोठ्या उत्साहात साजरा केला जातो. मात्र गेल्या दोन वर्षापासून कोरोना विषाणूने सर्वत्र थैमान घातल्यामुळे गेल्या वर्षी देखील यात्रा उत्सव रद्द करण्यात आला होता. यंदाही ओमायक्रोन विषाणूचा प्रसार थांबविण्याच्या सावधगिरीमुळे मा.जिल्हाधिकारी यांनी यात्रा उत्सव रद्द करण्याचे आदेश दिले आहेत. मात्र भाविक दर्शनापासून वंचित राहू नयेत म्हणून कोरोनाच्या सर्व प्रतीमबंधात्मक नियमांचे पालन करून दर्शनाची परवानगी देण्यात आली आहे.
शनिवार दि.१८ डिसेंबर रोजी दत्त जयंती व रविवार दि.१९ डिसेंबर रोजी दुपारी ३ वा.श्री दत्त पालखी मिरवणुकीचे आयोजन करण्यात आले आहे. दर्शनास येणाऱ्या भाविकांनी मास्कचा वापर करणे बंधनकारक आहे तसेच सुरक्षित अंतर ठेवणे, सॅॅनिटायझरचा वापर करणे, दर्शन झाल्यानंतर मंदिर परिसरात न थांबणे व गर्दी न करणे, या नियमांचे पालन करणे बंधनकारक आहे.
यात्रा काळात मंदिर परिसरात मिठाई, प्रसाद, पूजा साहित्य, खेळणी, पाळणे इत्यादी दुकाने लावण्यास सक्त मनाई करण्यात आली आहे. नियमांचे उल्लंघन करणाऱ्या व्यक्तीवर कठोर करवाई करण्यात येईल, अशा सूचना देखील पोलीस निरीक्षक, चांदवड, सरपंच , ग्रामपंचायत मेसनखेडे खुर्द, पोलीस पाटील मेसनखेडे खुर्द व श्री दत्तमंदिर ट्रस्ट मेसनखेडे खुर्द यांनी दिल्या आहेत.
