टोकियो ऑलिंपिकमध्ये ब्राँझ पदक जिंकल्यानंतर भारतीय पुरुषांचा हॉकी संघ पहिल्यांदाच हॉकीच्या रणांगणात उतरणार आहे. आशियाई चॅम्पियन्स करंडक या मानाच्या हॉकी स्पर्धेला उद्यापासून बांगलादेश येथील ढाक्यात सुरुवात होणार आहे. भारताचा सलामीचा सामना दक्षिण कोरियाविरुद्ध होत आहे.
भारतीय हॉकी संघाने ही स्पर्धा तीन वेळा जिंकण्याचा पराक्रम केला आहे. २०११ मध्ये चीन येथे झालेल्या स्पर्धेमध्ये भारताने पाकिस्तानला हरवत वीजेता होण्याचा मान संपादन केला होता. त्यानंतर २०१६ मध्ये मलेशिया व २०१८ मध्ये ओमान येथील स्पर्धेमध्येही भारताने बाजी मारली होती. आता बांगलादेश येथील स्पर्धा जिंकून सलग चौथ्यांदा या स्पर्धेचे जेतेपद पटकावण्यासाठी भारतीय संघ प्रयत्नशील असेल.
