भारताने कोरोना लसीकरणामध्ये विक्रम केला आहे. कोरोना प्रतिबंधात्मक लसीकरणात भारताने 200 कोटी लसींचा टप्पा पूर्ण केल्याबद्दल जगभरात भारताचं कौतुक होत असून शुभेच्छांचा वर्षाव होत आहे. आता बिल गेट्स यांनीही या विक्रमी लसीकरणाबद्दल भारताचे अभिनंदन केले आहे. मायक्रोसॉफ्टचे सह-संस्थापक आणि जगातील चौथे सर्वात श्रीमंत व्यक्ती बिल गेट्स यांनी भारताला शुभेच्छा दिल्या आहेत. भारताने केवळ 18 महिन्यांमध्ये 200 कोटी कोरोना लसींचा टप्पा पूर्ण केला आहे. केंद्रीय आरोग्य मंत्री मनसुख मांडविया यांनी सांगितलं की, भारताने फक्त 18 महिन्यांमध्ये कोरोना प्रतिबंधात्मक लसींचे 200 कोटीहून अधिक डोस दिले आहेत.
बिल गेट्स यांनी ट्विट करत म्हटलं आहे की, ‘भारताचे पंतप्रधान नरेंद्र मोदी यांचं अभिनंदन. भारताचा 200 कोटी लसीकरणासाठी आणखी एक मैलाचा दगड. कोरोनाचा प्रभाव कमी करण्यासाठी भारतीय लस उत्पादक आणि भारत सरकार यांच्यासोबतच्या आमच्या भागीदारीबद्दल आम्ही कृतज्ञ आहोत.’
