मनमाड:- मनमाड मधील गूड शेफर्ड स्कूल मध्ये 14 सप्टेंबर रोजी राष्ट्रीय हिंदी दिन उत्साहात साजरा करण्यात आला. याप्रसंगी शाळेतील विद्यार्थ्यांनी हिंदी भाषा राष्ट्राच्या जडणघडणीमध्ये आणि देशाची अखंडता अबाधित ठेवण्यामध्ये कशाप्रकारे योगदान देत आहे याचा उल्लेख आपल्या भाषणामधुन केला. इयत्ता ५ वी, ६ वी, ७ वी च्या विद्यार्थ्यांसाठी निबंध स्पर्धेचे आयोजन करण्यात आले होते. तसेच इयत्ता ८ वी, ९ वी, व १० वीच्या विद्यार्थ्यांसाठी तात्काळ एक विषय देऊन त्यांची वकृत्व स्पर्धा घेण्यात आली. या वक्तृत्व स्पर्धेच्या माध्यमातून विद्यार्थ्यांचे मनोबल वाढविण्याचा प्रयत्न करण्यात आला. शाळेचे प्राचार्य डॉ. क्लेमेंट नायडू यांनी हरिवंशराय बच्चन यांच्या कवितेच्या माध्यमातून विद्यार्थ्यांना लढण्याची आणि जिंकण्याची प्रेरणा दिली. कार्यक्रमाचे सूत्रसंचालन हिंदी विभाग प्रमुख श्री. कुलदीप परदेशी यांनी केले. याप्रसंगी शाळेतील सर्व शिक्षक शिक्षकेतर कर्मचारी व विद्यार्थी उपस्थित होते.
