मनमाड : योगेश म्हस्के – महाराष्ट्र राज्याचे आराध्य दैवत छत्रपती शिवाजी महाराज यांची जयंती देशभरात मोठ्या जल्लोषात साजरा झाली , याच दिनाचं औचित्य साधुन नांदगाव-मनमाड मराठी पत्रकार संघाच्या वतीने स्वराज्यातील मातीचे गड-किल्ले बनविण्याच्या स्पर्धेचे आयोजन करण्यात आले होते.
या स्पर्धेत शहरातील तब्बल 40 लहान -मोठ्या स्पर्धकांनी प्रत्यक्ष आपला सहभाग नोंदवला , आपल्या महाराष्ट्रात किल्ल्यांना एक आगळेवेगळे स्थान आहे. हे ऐतिहासिक किल्ले आपल्या महाराजांनी केलेल्या पराक्रमाची साक्ष देतात. लहान मुलांमध्ये किल्ल्यांविषयी व इतिहासाविषयी माहिती व्हावी या हेतूने शिवजयंतीच्या निमित्ताने शहर पातळीवर मातीचे किल्ले बनविण्याचे स्पर्धेचे आयोजन पत्रकार संघाच्या वतीने करण्यात आले होते. किल्ले बांधणीतून छत्रपती शिवाजी महाराज, सहकारी मावळे, स्वराज्य आणि महाराष्ट्राचा मराठमोळय़ा इतिहास संस्कृतीची आठवण जागृत होते. या किल्ला स्पर्धेत, प्रामुख्याने किल्ले प्रतापगड , रायगड , शिवनेरी, सिंहगड , तोरणागड , जंजिरा इत्यादी किल्यांच्या उत्तम प्रतिकृती स्पर्धकांनी प्रत्यक्ष साकारल्या होत्या .छत्रपती शिवाजी महाराज यांची शिकवण तसेच महाराजांनी कसे स्वराज्य निर्माण केले याची कल्पना ठेवावी व येणाऱ्या पिढीला त्याची पूर्ण माहिती मिळावी यासाठी या स्पर्धेचे आयोजन करण्यात आले होते.
या स्पर्धेचा पारितोषिक वितरण समारंभ रविवार दि. 26/2/2023 रोजी सायंकाळी 5 वाजता , महात्मा फुले वाचनालय आणि अभ्यासिका, आय.यु.डी.पी. , मनमाड येथे प्रमुख मान्यवर , सहभागी स्पर्धक आणि नांदगाव-मनमाड मराठी पत्रकार संघाच्या सदस्यांच्या उपस्थितीत संपन्न होणार आहे.
