मनमाड : राज्य शासनातर्फे नगर परिषदांना वैशिष्टपूर्ण कामासाठी विशेष अनुदान या योजनेंतर्गत मनमाड नगर परिषदेची नवीन प्रशासकीय इमारत बांधण्यासाठी १० कोटी रुपयांचा निधी राज्य शासनाच्या नगरविकास विभागाने गुरुवारी (दि.९) मंजूर केला आहे.
शहराच्या मध्यवर्ती ठिकाणी असलेल्या सध्याची मनमाड नगर परिषदेची इमारत नादुरुस्त असल्याने व अनेक ठिकाणी पडझड झाल्याने नवीन इमारत बांधण्यासाठी १० कोटी रुपयांची मागणी आमदार सुहास कांदे यांनी मुख्यमंत्र्याकडे केली होती. ती मुख्यमंत्र्यांनी मान्य करीत गुरुवारी विधानसभेत आपल्या भाषणात मनमाड नगर परिषदेला वैशिष्ट्यपूर्ण कामासाठी १० कोटींचे अनुदान मंजूर करत असल्याची घोषणा केली आहे.
नवीन नगर परिषद प्रशासकीय
इमारतीच्या प्रकल्प खर्चाच्या ९० टक्के हिस्सा हा राज्य शासनाचा व १० टक्के हिस्सा मनमाड नगर परिषदेचा राहणार आहे. कार्यान्वयन यंत्रणाही मनमाड नगर परिषद राहणार आहे. त्यानुसार लवकरच या कामाची ई- निविदा निघणार आहे. सदर काम पूर्ण करण्याची मुदत ३१ मार्च २०२४ राहणार आहे.
या वैशिष्ट्यपूर्ण कामासाठी राज्य शासनाकडून मंजूर करण्यात आलेली ९० टक्के म्हणजे ९ कोटी रुपयांची अनुदानाची रक्कम तात्काळ मनमाड नगर परिषदेला कोणत्याही प्रकारची कपात न करता वितरित केली जावी, असे या शासन निर्णयात नमूद करण्यात आले आहे. त्यात नगर परिषदेने १० टक्के म्हणजे, १ कोटी रुपयांचा स्वनिधी भरायचा आहे. या निधीमुळे नगरपरिषदेची अद्ययावत इमारत होणार असल्याने अनेक अडचणी दूर होणार आहेत.
