बंद घराचे कुलूप तोडून मनमाड शहरात २५००० ची धाडसी चोरी

मनमाड – शहरातील शांतीनगर भागात असलेल्या नेहरूनगर मध्ये एका बंद असलेल्या घराचे कुलूप तोडून अज्ञात इसमाने २५ हजाराचा ऐवज लंपास केल्याची घटना घडली. याप्रकरणी मनमाड पोलीस स्थानकात चोरीचा गुन्हा दाखल करण्यात आला आहे.
या प्रकरणी उत्तम रामराव ठाकरे वय ६४, सेवानिवृत्त,रा. नेहरूनगर,शांतीनगर मागे यांनी घटनेची फिर्याद दिली आहे.फिर्यादी हे बाहेरगावी गेले असताना तीन अनोळखी इसमानी घरातील दरवाजाचा कडीकोंडा तोडून प्रवेश करून दोन लिनोवो कंपनीचे लॅपटॉप,पाच हजार रुपये रोख व चार चाकी वाहनांच्या चाव्या असा एकूण २५ हजाराचा मुद्देमाल घरफोडी करून चोरून नेला असे फिर्यादीत म्हटले आहे. याप्रकरणी शहर पोलिसांनी गुन्हा दाखल केला असून पोलीस निरीक्षक बाळासाहेब थोरात यांच्या मार्गदर्शनाखाली पुढील तपास सुरू आहे.