इंदौर – पुणे राष्ट्रीय महामार्गावरील मनमाड नजीक असलेल्या मनमाडकडे येणाऱ्या ट्रक वरील चालकाचे नियंत्रण सुटल्याने अनकवाडे शिवारात असलेल्या रेल्वे पुलाचे कथडे तोडून पुलाखाली असलेल्या मनमाड – पुणे लोहमार्गानजिक गाडी कोसळली. सुदैवाने या अपघातामध्ये कोणतीही जीवित हानी झाली नसून चालकाला किरकोळ मार लागला आहे. चालकास मनमाड येथील खाजगी रुग्णालयात उपचारासाठी दाखल करण्यात आले आहे.
याबाबत अधिक माहिती अशी की, शनिवारी रात्री आठ वाजेच्या सुमारास नगरसुलहून मनमाड कडे येत असताना अनकवाडे शिवारात असलेल्या पुलावर ट्रक गाडी क्रं. एमएच १५ जी ४९४३ वरील चालक गुलाब देवरे वय – ४५ रा. उमराणा ता. देवळा याचे समोरून येणाऱ्या गाडीने कट मारल्याने गाडीवरील नियंत्रण सुटले.यामुळे पुलचे कथडे तोडून जवळपास ३० फुट गाडी पुलाखाली असणाऱ्या मनमाड – अहमदनगर लोहमार्गानजिक कोसळली. सुदैवाने लोहमार्गाच्या ७-८ फुट लांब गाडी कोसळल्याने मोठा अनर्थ टळला. घटनास्थळी रेल्वे सुरक्षा बलाचे कर्मचारी, लोहमार्ग पोलीस आणि स्थानिक नागरिक यांनी मोठी गर्दी केली होती.
