30 सप्टेंबरनंतर दोन हजारच्या नोटा दानपेटीत टाकू नका’, असे आवाहन साई संस्थानच्या वतीने साई भक्तांना केले आहे. 30 सप्टेंबर पर्यंत साईंच्या दानपेटीत दोन हजारच्या नोटा स्वीकारल्या जातील. मागील नोटबंदीच्या काळातील 3 कोटी रुपयांच्या अजूनही नोटा पडून असल्याने साई संस्थानने हा निर्णय घेतला आहे. 30 सप्टेंबर नंतर दोन हजारच्या नोटा न टाकण्याचे आवाहन साई संस्थांचे मुख्य कार्यकारी अधिकारी पी सिवा शंकर यांनी केले आहे.
देशभरातून दररोज हजारो भाविक साईंच्या दर्शनाला शिर्डीत हजेरी लावत असतात 10 रुपयांपासून लाखोंचे दान साईंच्या झोळीत अर्पण करतात. या आलेल्या दानाची मोजदाद आठवड्यातून मंगळवार आणि शुक्रवार या दोन दिवशी केली जाते. साईबाबा संस्थान दानाची मोजदाद केल्यावर कुठलीही रक्कम स्वतःकडे न ठेवता थेट बँकेत जमा करते त्यामुळे आता 2 हजार रुपयांच्या नोट संदर्भात झालेल्या निर्णयामुळे साईबाबा संस्थान कोणतीही अडचण नसून आलेल्या नोटा या थेट बँकेत जमा होतील. मात्र दोन हजार रुपयांच्या नोटा दानात येण्याच प्रमाण मागील काही महिन्यांपासून अत्यल्प असून मागील नोटबंदीनंतर हजार आणि पाचशेच्या नोटा मोठ्या प्रमाणात दानात उपलब्ध झाल्या होत्या. त्यामुळे आता झालेल्या निर्णयानंतर दोन हजारांच्या नोटांचे दान आगामी काळात वाढणार का हे आगामी काळातच स्पष्ट होईल.
