शालेय पोषण आहार शिजवणाऱ्या महिलांचे आमरण उपोषण, आज हुतात्मा चौकात आत्मदहणाचा इशारा

नांदगाव सोमनाथ घोगांणे


नांदगाव तालुक्यातील आधारवड महिला बहुउद्देशीय सेवाभावी संस्थेच्या वतीने अध्यक्षा संगीता सोनवणे यांच्या नेतृत्वाखाली जुन्या तहसील कार्यालयाच्या गेट जवळ मासीक मानधनात वाढ, अपघाती विमा यासह इतर मागण्यांसाठी प्राणांतिक उपोषण सुरू केले आहे.
निवेदनात म्हटले आहे की, शालेय पोषण आहार शिजवणाऱ्या महिलांना अत्यंत तुटपुंज्या स्वरुपात मानधन मिळते यासह अन्न शिजवतांना अनेकदा अपघात होऊन महिला जखमी झाल्या आहेत. त्यांना अपघाती विमा मिळावा यासाठी आधारवड महिला बहूउद्देशीय सेवाभावी संस्थेच्या वतीने नांदगाव जुन्या तहसील कार्यालयाच्या प्रवेश द्वारावर प्राणांतिक उपोषण सुरू केले आहे. यावेळी तालुक्यातील पोषण आहार शेकडो महिला कर्मचारी मोठ्या संख्येने सहभागी झाले होते.
प्रभारी गटशिक्षणाधिकारी प्रमोद चिचोले यांनी भेट घेऊन हा निर्णय केवळ नांदगाव तालुक्याचा नसून संपूर्ण राज्याचा आहे यामुळे उपोषण मागे घ्या अशी विनंती केली मात्र सर्व महिलांनी यास विरोध केला आता जोपर्यंत सरकार दखल घेत नाही तोपर्यंत आम्ही मागे हटणार नाही अशी भूमिका घेतल्याने उपोषण सुरूच आहे. आधारवड महिला सेवाभावी संस्थेच्या सौ. संगिता सोनवणे यांनी आज हुतात्मा चौकात सामुहीक आत्मदहणाचा इशारा दिला आहे.