🚩 आषाढी एकादशी 🚩 -फलक रेखाटन

आषाढी एकादशी निमित्त लाखो वारकरी,भाविक आपले देह भान हरपून विठू नामाचा जयघोष करत टाळ मृदंग ,विणा हाती घेत अभंग गात विठ्ठलाच्या ओढीने पायी वारी करत पंढरपूर येथे दाखल होतात. देशाच्या कानाकोपऱ्यातून उसळलेला हा भक्तीचा सागर या अफाट जनसागरास आपल्या विठुरायाचे दर्शन व्यवस्थित होण्यासाठी प्रशासनाच्या वतीने चोख बंदोबस्त करणारे पोलीस आपले कर्तव्य तितक्याच आनंदाने व निष्ठेने बजावतात. दर्शनासाठी आलेल्या लहान,थोर,वृद्ध,पुरुष व महिला यांची योग्य देखभाल व काळजी घेत हा खाकीतील कठोर समजला जाणारा पोलीस वर्ग देखील विठ्ठलाच्या सावळ्या भक्तीप्रेमात तल्लीन होऊन जातो. त्याचीच प्रचीती महिला पोलीस वर्गात दिसून येते. वारकाऱ्यांसोबत ,रिंगण सोहळ्यात फुगडी खेळत, टाळ, मृदंग वाजवत अभंग म्हणत डोक्यावर तुळशी वृंदावन घेऊन आधुनिक रखुमाई चे दर्शन या भक्तीमय सोहळ्यात होते. अध्यात्म व कर्तव्य याचा संगम या आषाढी वारीत बघायला मिळतो.
या अध्यात्म व कर्तव्याचा भाव दर्शविणारे फलक रेखाटन नूतन माध्यमिक विद्यालय भाटगाव.ता.चांदवड. जि.नाशिक.चे कलाशिक्षक श्री.देव हिरे यांनी शाळेच्या दर्शनी फळ्यावर रंगीत खडू माध्यमात रेखाटले आहे.