नुकत्याच पार पडलेल्या नगरपालिका व नगरपंचायत निवडणुकीत महाराष्ट्रात नंबर एक राहिलेल्या भारतीय जनता पक्षात मात्र नांदगाव तालुक्यात वेगळे चित्र पाहायला मिळत आहे. निवडणुकीदरम्यान जिल्हा पदाधिकारी विश्वासात न घेत असल्याच्या कारणावरून मनमाड शहराच्या 50 पेक्षा जास्त भाजपा पदाधिकाऱ्यांनी जिल्हाध्यक्ष यतीन कदम यांच्याकडे राजीनामे दिले होते.
आता मनमाड पाठोपाठ नांदगाव मध्ये देखील भाजपमध्ये अंतर्गत नाराजीनाट्य सुरू असल्याचे चित्र आहे. नांदगाव भाजपा पदाधिकाऱ्यांनी जिल्हाध्यक्ष यतीन कदम यांची भेट घेत संजय सानप व दत्तराज छाजेड या दोघांना पदमुक्त करण्याची विनंती केली आहे, त्यांनी दिलेल्या निवेदनात शहराध्यक्ष संजय सानप व व्यापारी आघाडी जिल्हाध्यक्ष दत्तराज छाजेड यांनी नांदगाव नगर परिषद निवडणुकीत भारतीय जनता पक्षाची ताकद असताना देखील केवळ दोन जागा घेत शिवसेनेसोबत युती जाहीर केली होती, या निर्णयात स्थानिक कोणत्याही पदाधिकाऱ्यांना विश्वासात घेण्यात आलेले नव्हते व कोणत्याही प्रकारची चर्चा करण्यात आलेली नव्हती.
भारतीय जनता पक्षाची थेट नगराध्यक्ष सह नगरसेवक पदाच्या उमेदवारांची संख्या असताना देखील या प्रकारे युती जाहीर केल्यामुळे पक्षाची प्रतिमा ढासळली असून या दोन्ही पदाधिकाऱ्यांवर तात्काळ कारवाई करून त्यांना पदमुक्त करण्यात यावे अशी विनंती देखील सदर निवेदनात करण्यात आलेली आहे. भाजप नांदगाव शहराध्यक्ष संजय सानप व व्यापारी आघाडीचे जिल्हाध्यक्ष दत्तराज छाजेड यांनी स्थानिक कोणत्याही पदाधिकाऱ्यांना विश्वासात न घेता स्वतःच्या वैयक्तिक स्वार्थासाठी नगरपालिका निवडणुकीत शिवसेने सोबत मात्र दोन जागा घेत आघाडी जाहीर केली होती त्यातही दत्तराज छाजेड यांनी ऐनवेळी माघार घेतल्याचा आरोप निवेदनात करण्यात आला आहे.
सदर निवेदनावर दिगंबर कवडे, प्रदीप थोरात, डॉ. राजेंद्र आहेर, सतीश अहिरे, नारायण मोरे, सतीश शिंदे, राजेंद्र गांगुर्डे, अड.उमेश सरोदे , गणेश रिंढे, बळवंत शिंदे, सौ.तारा शर्मा, गणेश शर्मा आदींच्या स्वाक्षऱ्या आहेत.
