मराठी भाषा गौरव दिनानिमित्त काव्यवाचन स्पर्धा संपन्न
मनमाड – येथील महात्मा गांधी विद्यामंदिर संचलित कला, विज्ञान व वाणिज्य (स्वायत्त) महाविद्यालयात मराठी भाषा गौरव दिन साजरा करण्यात आला. याप्रसंगी आपले अध्यक्षीय मनोगत व्यक्त करताना महाविद्यालयाचे प्राचार्य डॉ. अरुण विठ्ठल पाटील बोलत होते. त्यांनी मराठी भाषेचे महत्त्व, त्यातील गोडवा, मराठी साहित्याची समृद्ध परंपरा, प्राचीन मराठी, शिवकालीन मराठी ते आधुनिक मारठी याचा सांगोपांग आढावा घेतला. बोली भाषेतील अभिव्यक्तीमुळे मराठी भाषा समृद्ध आहे असेही ते म्हणाले. भाषेचा गौरव म्हणजे संस्कृतीचा गौरव, ती भाषा बोलणाऱ्या प्रत्येकाचा गौरव असल्याचे त्यानी सांगितले. सुरुवातीला कविश्रेष्ठ कुसुमाग्रज यांच्या जयंतीनिमित्त त्यांच्या प्रतिमेचे पूजन महाविद्यालयाचे प्राचार्य डॉ. अरुण विठ्ठल पाटील यांच्या हस्ते करण्यात आले. यावेळी वरिष्ठ व कनिष्ठ महाविद्यालयाचा मराठी विभाग व ग्रंथालय विभाग यांच्या संयुक्त विद्यमाने भाषा गौरव दिनाचे औचित्य साधून विद्यार्थ्यांच्या काव्यवाचन स्पर्धेचे आयोजन करण्यात आले. कार्यक्रमाचे प्रास्ताविक मराठी विभाग प्रमुख डॉ. धनराज धनगर यांनी केले. सूत्रसंचालन प्रा. सोमनाथ पावडे यांनी केले तर आभार ग्रंथपाल डॉ. राहुल लोखंडे यांनी मानले.
यावेळी काव्यवाचनात एकूण १६ विद्यार्थ्यांनी सहभाग घेतला. या नवोदित कवींच्या कवितांमध्ये आई, वडील, मन, प्रेम, निसर्ग असे विषय होते. वरिष्ठ महाविद्यालयीन गटातून प्रथम क्रमांक सौ. वर्षा जयंत कुलकर्णी, द्वितीय क्रमांक कु. रचना विजय चंदनशिव, तृतीय क्रमांक रुपेश बाळू सरोदे यांनी पारितोषिके पटकावली. तर कनिष्ठ महाविद्यालयीन गटातून स्वाती मार्कंड (प्रथम क्रमांक), विशाखा शिंदे (द्वितीय क्रमांक), गौरी मार्कंड (तृतीय क्रमांक) यांनी यश संपादन केले.
