मनमाड महाविद्यालयात ‘आविष्कार–२०२६’ संपन्न.

विद्यार्थ्यांच्या संशोधनवृत्तीला चालना देणाऱ्या ‘आविष्कार–२०२६’ संशोधन स्पर्धेचे आयोजन महात्मा गांधी विद्यामंदिर संचलित कला, विज्ञान व वाणिज्य महाविद्यालय मनमाड येथे उत्साहात करण्यात आले. या स्पर्धेला पदवी व पदव्युत्तर स्तरावरील विद्यार्थ्यांचा उत्स्फूर्त प्रतिसाद मिळाला. स्पर्धेमध्ये पंचवीसपेक्षा अधिक विद्यार्थ्यांनी विविध विषयांवरील आपल्या संशोधन संकल्पना आकर्षक पोस्टर्सच्या माध्यमातून सादर केल्या. महाविद्यालयाचे प्राचार्य डॉ. पी. जी. आंबेकर, उपप्राचार्य डॉ. बी. एस. देसले तसेच स्पर्धेसाठी निमंत्रित परीक्षक व प्रमुख पाहुणे प्राचार्य डॉ. सी. जी. दिघावकर यांची प्रमुख उपस्थिती होती. प्राचार्य डॉ. पी. जी. आंबेकर आणि प्रमुख पाहुणे डॉ. सी. जी. दिघावकर यांनी विद्यार्थ्यांच्या पोस्टर्सची बारकाईने पाहणी करून त्यांच्या संशोधन संकल्पना समजून घेतल्या. विद्यार्थ्यांशी संवाद साधत त्यांनी संशोधनाची दिशा, विषयाची निवड, नावीन्यता तसेच संशोधनाची उपयुक्तता याबाबत मार्गदर्शन केले. त्यांच्या मार्गदर्शनामुळे विद्यार्थ्यांना संशोधनाच्या पुढील वाटचालीसाठी प्रेरणा मिळाली. यावेळी महाविद्यालयाचे कुलसचिव श्री. समाधान केदारे, प्रा. डॉ. पी. टी. वानखेडे, समन्वयक, अंतर्गत गुणवत्ता हमी कक्ष, तसेच महाविद्यालयातील प्राध्यापकवृंद व विद्यार्थी मोठ्या संख्येने उपस्थित होते. कार्यक्रमाचे आयोजन महाविद्यालयाचे शैक्षणिक व संशोधक समन्वयक डॉ. आर. एस. काळे यांनी केले. डॉ. आरती छाजेड, डॉ. स्वप्नाली पाटील-पांडे तसेच विद्यार्थ्यांनी विशेष परिश्रम घेतले. विद्यार्थ्यांच्या संशोधनवृत्तीला प्रोत्साहन देणारा आणि नवकल्पनांना व्यासपीठ उपलब्ध करून देणारा हा उपक्रम उत्साहपूर्ण वातावरणात संपन्न झाला.