महाराष्ट्रातील सिंधुदुर्गमधील मालवणची श्रिया परबने लेबनान येथे पार पडलेल्या मिस टुरीझम युनिव्हर्स – 2021 स्पर्धेत विजयी होण्याचा मान मिळविला आहे. आशिया खंडातील 22 देशांच्या राष्ट्रीय स्तरावर आयोजित करण्यात आलेल्या या स्पर्धेत श्रियाने भारताचे प्रतिनिधित्व केले. ‘मिस टुरिसम युनिव्हर्स आशिया 2021’ हा किताब पटकावून श्रियाने सर्व भारतीयांची अभिमानाने मान उंचावली आहे. यासाठी तिचे सर्वत्र कौतुक होत आहे. श्रियाने तिच्या यशाचे सर्व श्रेय तिचे पालक, तिचे मार्गदर्शक, प्रशिक्षक ऋषीकेश मिराजकर यांना दिले आहे.
मुळची सिंधुदुर्गच्या मालवण तालुक्यातील कांदळगाव येथील श्रिया परबने मुंबई येथे ऑगस्ट 2021 मध्ये मिस तियारा स्पर्धा जिंकली होती. ही स्पर्धा जिंकल्यानंतर तिला लेबनॉनमध्ये मिस टुरिसम युनिव्हर्स आशिया 2021 स्पर्धेत देशाचे प्रतिनिधित्व करण्याची संधी मिळाली. श्रियाने पहिल्या दिवसापासूनच जोरदार तयारी करून प्रतिस्पर्धकांच्या मनात धडकी भरवली होती. चाणाक्ष बुद्धिमत्ता आणि सर्वाना घायाळ करणारं सौंदर्य याच्या जोरावर श्रीयाने अंतिम फेरीचं आव्हान देखील यशस्वी पेललं. श्रियाच्या सादरीकरणाने परीक्षकांची मनं जिंकली आणि तिचा विजय निश्चित झाला.
