महाराष्ट्रात बलात्काराच्या घटना कमी होण्याचे नाव घेताना दिसत नाही, दररोज राज्यातील विविध भागातून बलात्काराच्या घटना समोर येत आहेत. नाशिकजवळील औढेवाडी येथे मानवतेला काळिमा फासणारी घटना घडली आहे, एका नऊ वर्षाच्या मुलीवर पळत ठेऊन घराजवळील शेतात नेऊन तिच्यावर एका ४३ वर्षीय आणि एका अल्पवयीन दोघांनी बलात्कार केल्याची घटना समोर आली आहे.
सध्या शेतीची कामे सुरू असल्यामुळे मुलीचे आई-वडील तिला घरात सोडून शेतात कामाला जात असत. मुलगी घरात एकटी असते, यावर नजर ठेवून गणेश ऊर्फ शंकर निवृत्ती कुंदे (वय 43, रा. औंढेवाडी) याने तिच्या राहत्या घरी शेतात नेऊन बलात्कार केला. अत्याचार केल्याची माहिती कुणाला सांगितल्यास कुटुंबाला ठार मारेन, अशी धमकी दिली. त्यानंतर एका सोळा वर्षांच्या अल्पवयीन मुलानेही मुलीवर जवळपास तीन वेळा अत्याचार केला. त्यामुळे मुलीच्या पोटात दुखू लागले. हा त्रास असह्य झाल्याने तिने आई-वडिलांना सांगितले. आई-वडिलांनी विश्वासात घेऊन विचारणा केली असता तिच्यावर दोघांनी अत्याचार केल्याचे समजले. त्यानंतर मुलीच्या वडिलांनी तातडीने दोघांविरुद्ध सिन्नर पोलिस ठाण्यात तक्रार दाखल केली. पोलिसांनी अल्पवयीन संशयितासह गणेश कुंदेला बेड्या ठोकल्या आहेत.
