कोरोना विषाणूच्या पार्श्वभूमीवर जिल्ह्यातील मुदत संपलेल्या नगर पंचायतींचा निवडणूक कार्यक्रम राज्य निवडणूक आयोगाने जाहीर केला आहे. यात नाशिक जिल्ह्यातील निफाड, पेठ, सुरगाणा, देवळा, कळवण या ५ नगर पंचायतींचा समावेश आहे.
राज्य निवडणूक आयोगाने प्रसिद्ध केलेल्या प्रसिद्धी पत्रकात या संदर्भातील आचार संहिता नमूद करण्यात आली आहे. त्या नुसार दि.२९ नोव्हेंबर रोजी अंतिम प्रभाग रचना निहाय मतदार यादी प्रसिद्धी करण्यापासून सुरुवात होणार असून दि.२१ डिसेंबर रोजी मतदान व २२ डिसेंबर रोजी मतमोजणी होऊन महाराष्ट्र शासन राजपत्रात निकाल प्रसिद्ध करून निवडणूक कार्यक्रमाची सांगता होईल.
राज्य निवडणूक आयोगाने नामनिर्देशन पत्र व शपथपत्र सहजरित्या भरता यावे यासाठी ऑनलाइन व्यवस्था केली आहे. सर्व उमेदवारांना ऑनलाइन नामनिर्देशन पत्र भरने अनिवार्य आहे. यासाठी http://panchayatelection.gov.in या संकेत स्थळावर नोंदणी करून नामनिर्देशन पत्र व शपथपत्र यामध्ये माहिती भरून स्वाक्षरी करून विहित वेळेत व विहित पद्धतीने निवडणूक अधिकाऱ्यांकडे दाखल करावे.
