मतदान ओळखपत्राशी आधारकार्ड जोडण्याची तरतूद असलेले सुधारित निवडणूक कायदा विधेयक लोकसभेमध्ये प्रचंड गदारोळामध्ये आवाजी मतदानाने संमत झाले. या विधेयकाच्या कायदेशीर वैधतेला आव्हान देत विधेयक मागे घेण्याची आक्रमक मागणी विरोधकांनी केली. तसेच लोकसभाध्यक्षांसमोरील हौद्यात उतरून जोरदार घोषणाबाजीही केली. मात्र या गोंधळामध्येच विधेयक मंजूर करण्यात आले.
राष्ट्रीय पातळीवर मतदार यादीमध्ये सुसूत्रता आणणे आणि बोगस मतदान रोखण्यासाठी आधार कार्ड मतदान ओळखपत्राशी जोडण्याच्या प्रस्तावासह प्रस्तावित निवडणूक सुधारणा असलेल्या विधेयकाचा मसुदा मागील आठवड्यात केंद्रीय मंत्रिमंडळाच्या बैठकीत मंजूर करण्यात आला होता. त्याआधारे आज लोकसभेत निवडणूक कायदा (दुरुस्ती) विधेयक २०२१ कायदा मंत्री किरेन रिजीजू यांनी मांडले. मतदार यादी तयार करणाऱ्या अधिकाऱ्यांना नागरिकांकडून आधार कार्डची मागणी करता येईल.
