बिहार मधील विरपुर सीमेवर कार्यरत असताना तालुक्यातील बोलठाण येथील जवान अमोल पाटील यांचा उच्च दाबाच्या वीजेचा धक्का लागून वीरमरण प्राप्त झाले होते.त्यांचे पार्थिव औरंगाबाद येथे हवाई दलाच्या विमानाने आणून त्यांच्या मूळगावी बोलठाण येथे आणण्यात आले होते. काल शोकाकुल वातावरणात त्यांचेवर अंत्यसंस्कार करण्यात आले. शाहिद जवान अमोल यांच्या लहान भावाने पाटील यांच्या पार्थिवाला मुखाग्नी दिला. वीर जवान अमर रहे, भारत माता की जय च्या घोषणांनी परिसर दुमदुमून गेला.महाराष्ट्र पोलीस दलातर्फे त्यांना बंदुकीच्या फैरी झाडून मानवंदना देण्यात आली.यावेळेस परिसरातील ग्रामस्थांची मोठी उपस्थिती होती.तालुक्याचे आमदार सुहास कांदे,वैजपुरचे आमदार रमेश बोरणारे, मा आ.अनिल आहेर, संजय पवार, प्रांताधिकारी सोपान कासार, नायब तहसीलदार मार्कंड, सुभाष कुटे, बबी काका कवडे,आदींनी पुष्पचक्र वाहून आदरांजली वाहिली.आमदार कांदे यांनी वीर जवान अमोलची विरपत्नी आणि वीरकन्या यांचे नावे एक जबाबदार भाऊ म्हणून ५ लाख रुपये एफ डी करण्याचे जाहीर केले तसेच शासकीय सर्व योजना पूर्ततेसाठी कुठेही जाण्याची गरज नाही, त्या योजनांची पूर्तता आपल्या घरी येऊन मी पूर्ण करून देईन व वीर जवान अमोल पाटील यांचे बोलठाण येथे भव्य स्मारक उभारण्याचे आश्वासन दिले.
