सर्वसामान्यांच्या तक्रारी, अडचणींचा तात्काळ निपटारा करण्यासाठी नाशिकमध्ये सोमवारी, 7 फेब्रुवारी रोजी जिल्हास्तरीय लोकशाही दिनाचे आयोजन करण्यात आले आहे. दुपारी 2.00 वाजता जिल्हाधिकारी कार्यालय, मध्यवर्ती सभागृह येथे हा लोकशाही दिन होईल, अशी माहिती निवासी उपजिल्हाधिकारी भागवत डोईफोडे यांनी दिली आहे. जिल्हाधिकारी लोकशाही दिनासाठी जिल्हाधिकारी, जिल्हा पोलीस अधीक्षक, जिल्हा पोलीस आयुक्तालय असल्यास अथवा पोलीस उपायुक्त दर्जाचा अधिकारी, जिल्हा परिषदेचे मुख्य कार्यकारी अधिकारी तसेच पाटबंधारे, बांधकाम, परिवहन, सहकार, कृषी विभागांचे जिल्हास्तरीय प्रमुख अधिकारी व जिल्हा पाणीपुरवठा समन्वय अधिकारी यांची उपस्थिती असते. त्यामुळे संबंधित तक्रारदाराच्या अडचणीचे तात्काळ निवारण होते. त्याला जलद न्याय मिळतो.
जिल्हास्तरीय लोकशाही दिनाच्या अंमलबजावणीसाठी 26 सप्टेंबर 2012 च्या शासन परिपत्रकातील निकषांनुसार पाठविण्यात येणारे अर्ज विहीत नमुन्यात सादर करणे आवश्यक आहे. याकरिता चारही स्तरावरील लोकशाही दिनाकरिता पाठविण्यात येणारे अर्ज विहीत नमुन्यात 15 दिवस आधी 2 प्रतीत सादर करावे, तक्रार किंवा निवेदन वैयक्तिक स्वरूपाची असावी, तालुका लोकशाही दिनानंतर 1 महिन्यानंतर जिल्हाधिकारी कार्यालयात जिल्हा लोकशाही दिनात अर्ज सादर करावेत, असेही निवासी उपजिल्हाधिकारी भागवत डोईफोडे यांनी कळविले आहे. तसेच न्यायप्रविष्ठ प्रकरणे, राजस्व किंवा अपिल्स, सेवा विषयक, आस्थापना विषयक बाबी, विहित नमुन्यात नसणारे व त्यासोबत आवश्यक त्या कागदपत्रांच्या प्रति न जोडलेले अर्ज विचारात घेतले जाणार नाही याची नागरीकांनी नोंद घ्यावी, असेही शासकीय प्रसिध्दी पत्रकात नमुद करण्यात आले आहे.
