भालूर परिसरात तरसाचा धुमाकूळ; मानवी वस्तीत शिरकाव!

भालूर (वार्ताहर) उन्हाळ्यात पाण्याच्या शोधात मानवी वस्तीकडे येणारे जंगली प्राणी आता ऐन पावसाळ्यातही मानवी वस्तीत शिरकाव करत असून पाळीव जनावरांना तसेच नागरिकांनाही त्यांनी लक्ष्य करून हल्ले करण्याचा प्रयत्न केला जात आहे.
सविस्तर वृत्त असे की तरस या जंगली प्राण्याने रात्री आठ वाजेच्या सुमारास भालूर धरणाच्या परिसरात गायींना लक्ष्य केले त्यानंतर भालूर गावात आदिवासी वस्तीत रात्री नऊ च्या सुमारास या तरसाने धुमाकूळ घातला. गल्लीत काही तरुणांवर त्याने हल्ला करण्याचा प्रयत्न केला तर गल्लीत उभ्या असलेल्या दुचाकींची सीट कव्हर, गाडीचे शॉक अप यांना त्याने चावा घेतला. नंतर आदिवासी वस्तीतील तरुणांनी एकत्र येत त्याला गावाबाहेर पळवून लावले मात्र रात्रभर गावकऱ्यांच्या मनात भीतीचे वातावरण होते.दरम्यान वनविभागाने या वन्यप्राण्यांचा त्वरित बंदोबस्त करावा अशी मागणी ग्रामस्थांकडून केली जात आहे.
बिबट्या की तरस ?
दरम्यान सुरुवातीला सोशल मीडिया वर बिबट्या आल्याची माहिती पसरली आणि नेमका हा जंगली प्राणी बिबट्या की तरस याबाबत संभ्रम निर्माण झाला. मात्र जेव्हा त्याने गावातील आदिवासी वस्तीत शिरकाव केला तेव्हा नागरिकांनी सांगितले की बिबट्या नसून तो तरस आहे. परंतु या प्राण्याने गावात शिरकाव केल्याने नागरिक भयभीत झाले आहे.
फोटो: आदिवासी वस्तीत उभ्या असलेल्या दुचाकीच्या शॉक अप ला चावा घेतल्यानंतर लागलेले रक्त.