मनमाड (योगेश म्हस्के) : शेतकऱ्यांच्या मित्र असणारा बैल याच्याप्रती कृतज्ञता व्यक्त करणारा सण म्हणजे पोळा , उद्या शुक्रवारी पोळा सण सर्वत्र उत्साहात व पारंपारिक पध्दतीने साजरा केला जाणार आहे .
पोळा सणासाठी शेतकरी सज्ज झाला आहे.पोळ्यासाठी लागणाऱ्या विविध साहित्याची दुकाने देखील बाजारपेठेत सजली आहे. मातीचे बैल विक्री करणारे व्यापारी देखील निरनिराळे व विविध रंगी बैल जोड्या घेवून बाजारात दाखल झाले आहेत.यंदा पावसाने शेतकऱ्यांच्या आशा पल्लवीत केल्या आहे. त्याचा परिणाम शेतकऱ्यांच्या उत्साहावर दिसून आला आहे. शेतकरी पोळा सण साजरा करण्यासाठी आतूर झालेला आहे. यंदा पिकेही जोमात असल्याने शेतकरी आनंदी आहे. वर्षभर शेतात राबणाऱ्या बैलांना पोळ्यासाठी रंगीबेरंगी झुल, नवीन कासरे व इतर साहित्य घेण्यासाठी शेतकऱ्यांनी बाजारात गर्दी केलेली आहे.
