सध्या प्रायोगिक तत्वावर सुरू असलेल्या मनमाड – छत्रपती शिवाजी महाराज टर्मिनस मुंबई – मनमाड उन्हाळी विशेष सुपरफास्ट एक्सप्रेस या गाडीला १ ऑक्टोबर ते पाच जानेवारी २०२३ पर्यंत पुन्हा मुदतवाढ देण्यात आली आहे.यामुळे चाकरमाने,विद्यार्थी आणि व्यावसायीकांनी समाधान व्यक्त केले आहे.
गाडी क्रमांक ०२१०२ मनमाड मुंबई छत्रपती शिवाजी महाराज टर्मिनस आणि गाडी क्रमांक ०२१०१ छत्रपती शिवाजी महाराज टर्मिनस मनमाड ही गाडी आता एक ऑक्टोबर पासून पाच जानेवारी २०२३ पर्यंत दररोज तिच्या वेळापत्रकाप्रमाणे धावणार आहे.
प्रवाशांची मागणी लक्षात घेऊन सुरुवातीला तीन महिने प्रायोगिक तत्त्वावर मनमाड – कुर्ला गोदावरी एक्सप्रेसच्या धर्तीवर मनमाड – मुंबई – मनमाड समर एक्सप्रेस सुरू करण्यात आली. प्रवाशांचा वाढता प्रतिसाद लक्षात घेऊन पुन्हा तिसऱ्यांदा या गाडीला मुदतवाढ देण्यात आली असून ही गाडी आता पाच जानेवारी २०२३ पर्यंत मनमाड मुंबई मनमाड दररोज धावणार आहे. या गाडीच्या एकूण ९७ फेऱ्या या कालावधीत होतील.
