नायलॉन मांजावर बंदी असताना शहरात मोठ्या प्रमाणात मांजाची अवैध विक्री केली जाते. या मांजामुळे पशुपक्ष्यांसह माणसांनाही त्रास सहन करावा लागतो. काही वेळा अनेकांना आपले प्राणही गमवावे लागतात. त्यामुळे नायलॉन मांजा विक्रीवर बंदी घालण्यात यावी, या मागणीसाठी काल रिपाइंच्या वतीने पालिका प्रशासनाला निवेदन देण्यात आले.
शहरात मोठ्या प्रमाणात चायना असलेल्या नायलॉन मांजाची विक्री केली जात आहे. पतंग शौकीन पतंग उडवितांना या मांजाचा सर्रास वापर करतांना दिसत आहे. अनेकदा मांजा समोर असतो मात्र जाणाऱ्यांना तो मांजा दिसत नाही त्यामुळे येणाऱ्या जाणाऱ्या नागरीक, बालके व मोटारसायकलस्वारांना या मांज्यामुळे जखमी होण्याचे प्रकार घडत आहे तर काही वेळेस प्राणास देखील मुकावे लागण्याची शक्यता असते. त्यामुळे सदर नायलॉन मांजा विक्री तात्काळ बंद करण्यात यावी. तसेच दुकानात असलेला चायना नायलॉन मांजा जप्त करत दुकानदारावर कडक कारवाई करावी. यापुढे जर शहरात नायलॉन मांजा विक्री करतांना कोणी दिसले तर त्या दुकानात जाऊन रिपाइं स्वतः त्या दुकानातील मांजा जप्त करून आंदोलन छेडेल असा इशारा दिला आहे. शहरात छुप्या पद्धतीने होणाऱ्या मांजा विक्रीवर प्रतिबंध लावून संबंधित विक्रेत्यांवर कारवाई करण्याची मागणी पालिका प्रशासन अधिकारी अशोक पाईक यांना दिलेल्या निवेदनात केली आहे. यावेळी रिपाइंचे जिल्हाध्यक्ष राजेंद्र आहिरे, जिल्हा कार्याध्यक्ष गंगादादा त्रिभुवन, सचिव विलास आहिरे, पी आर निळे, रुपेश आहिरे, सुरेश शिंदे, सुशील खरे, नाना आहिरे, गुरू निकाळे, सुरेश जगताप, बाळासाहेब मोरे, चंद्रमनी उबाळे, कृष्णा पगारे, महेंद्र वाघ यांच्यासह रिपाइं पदाधिकारी, कार्यकर्ते उपस्थित होते.
