बिबट्याने केली वासराची शिकार

गोरक्षनाथ लाड
दरेगाव – गेल्या काही दिवसापासून चांदवड – देवळा तालुक्याच्या दोन्ही हद्दीत बिबट्यांने जनावरांवर हल्ला केल्याच्या घटना वाढत आहेत.ही घटना दरेगाव शिवारात वाघाड वस्तीलगत गिरणारे शिवारात माळावर गुरूवार दि.१५ रोजी पहाटेच्या सुमारास घडली.या घटनेमुळे परिसरातील शेतकऱ्यांमध्ये भीतीचे वातावरण निर्माण झाले आहे.
दरेगाव येथील रहिवासी असलेले शेतकरी भगवान बाबुराव सोनवणे यांची गिरणारे शिवारात शेती असून ते शेतात राहतात व शेतातच घराजवळ वासरू व जनावरे बांधलेली होती. गुरूवारी पहाटे ४ वाजताच्या सुमारास भगवान यांचे भाऊ उठले असता पहाटेच्या सुमारास बिबट्या हल्ला करून वासराचा फडशा पाडत असल्याचे निदर्शनात आले. याबाबत सोनवणे यांनी गुरूवारी सकाळी गिरणारे येथील पोलिस पाटिल अनिल वाघ यांना कळविले.पोलिस पाटिल यांनी देवळाचे वन विभागाला भ्रमणध्वनी करून कळविले असता तातडीने वनविभागाचे कर्मचाऱ्यांनी घटनास्थळ गाठून पहाणी केली.यावेळी पायाचे ठसे तपासले असता बिबट्याने वासराची शिकार केली आहे . नुकसानग्रस्त शेतकर्यास वन विभागाने आर्थिक मदत द्यावी.वाघाच्या भितीने परिसरातील नागरिकांमध्ये दहशतीचे वातावरण निर्माण झाले आहे.या परिसरात पिंजरा लावण्याची मागणी परिसरातील शेतकऱी व मजूर यांनी केली आहे.