नाशिक शिक्षक व पदवीधर मतदारसंघातून पराभूत झालेल्या महाविकास आघाडीच्या उमेदवार शुभांगी पाटील यांनी शनिवारी ठाकरे गटात प्रवेश केला. खऱ्या लढाईला आता सुरुवात झाली आहे, अशी प्रतिक्रिया शुभांगी पाटील यांनी ठाकरे गटात प्रवेश केल्यानंतर दिली.
विधानपरिषद निवडणुकीसाठी ठाकरे गटाने सर्वप्रथम शुभांगी पाटील यांना पाठिंबा दिला होता. त्यानंतर त्यांची महाविकास आघाडीच्या अधिकृत उमेदवार म्हणून घोषणा करण्यात आली. मात्र त्यांचा निवडणुकीत पराभव झाला. पराभवानंतर शुभांगी पाटील यांनी मातोश्री येथे उद्धव ठाकरे यांची भेट घेतली. तेथे त्यांनी ठाकरे गटात प्रवेश केला.
ठाकरे गटात प्रवेश केल्यावर शुभांगी पाटील यांनी पत्रकारांशी संवाद साधला. त्या म्हणाल्या, मी आधीच जाहिर केले की ठाकरे गटात प्रवेश करणार आहे. त्यानुसार आज मी ठाकरे गटात प्रवेश केला आहे. माझा पराभव झाला असला तरी आता तर खरी लढाई सुरु झाली आहे. मी एक दिवसाचे धरणे आंदोलन करणार आहे. जुनी पेन्शन योजना, बेरोजगारी व अन्य प्रश्नांकडे या आंदोलनातून सरकारचे लक्ष वेधणार आहे.
माझा पराभव झाला असला तरी मला ४० हजार मते पडली आहेत. माझी नऊ हजार मते बाद ठरली आहेत. एका सामान्य घरातील मुलीला एवढी मते मिळाली. जनतेच्या प्रेमामुळेच मला एवढी मते मिळाली हे संपूर्ण महाराष्ट्राने बघितले आहे.
