नांदगाव सोमनाथ घोंगाणे
विद्यार्थ्यांनी ध्येय निश्चित करुन पुढील शिक्षणाची दिशा ठरवावी. अभ्यासाचे नियोजन करुन परीक्षेला सामोरे गेल्यास यश नक्कीच मिळेल. त्यासाठी नियमित सराव ठेवा,पाठांतरावर भर देऊ नका,तो विषय समजून घ्या, मोबाईलचा अभ्यासात वापर कमी करुन क्रमिक पुस्तकांचा आधार घेऊन अभ्यासावर भर द्या, आणि भरपूर वाचन,चर्चा,टिपणे यावर भर देऊन अभ्यास केल्यास हमखास यशाचे शिखर गाठता येईल. असे प्रतिपादन प्रा. सुरेश नारायणे यांनी केले. ते भालूर येथील मविप्र संस्थेचे जनता कनिष्ठ महाविद्यालयात बारावी विद्यार्थ्यांना आशिर्वाद समारंभ प्रसंगी प्रमुख पाहुणे म्हणून विद्यार्थ्यांना मार्गदर्शन करताना बोलत होते. कार्यक्रमाच्या अध्यक्षस्थानी महाविद्यालयाचे प्राचार्य महिरे एस.टी. होते. व्यासपीठावर प्रा. हिरे एस.के.प्रा.पाटोळे एस.बी.प्रा.श्रीमती जगताप जे.एस.प्रा.श्रीमती धोंड जे.पी. आदी मान्यवर उपस्थित होते. यावेळी बारावीच्या विद्यार्थ्यांनी शाळेसाठी पाहुण्यांच्या हस्ते सायकल स्टॅण्ड भेट म्हणून दिले. अश्विनी राठोड, विकास घोरपडे, श्रध्दा लहिरे, रुपाली पवार, मनिषा राठोड यांनी शाळेबद्दल व शिक्षकांबद्दल आदरभाव व्यक्त केला. प्रा. श्रीमती जे.एस.जगताप यांनीही मनोगत व्यक्त केले. यावेळी अहंकार बाजूला सारुन समाजात सौजन्याने वागा,आई, वडील आणि गुरुजनांचा आदर राखा त्यांना विसरु नका अश्या अध्यक्षीय भाषणात प्राचार्य महिरे एस.टी. यांनी सांगितले. तसेच परीक्षेत संबंधी काही सूचना विद्यार्थ्यांना त्यांनी दिल्या. कार्यक्रमाचे सूत्रसंचालन प्राजक्ता चोळके व कविता मडके यांनी केले.
