धुळे विभागांतर्गत महाराष्ट्र राज्य वीज वितरण कंपनी अंतर्गत केलेल्या वीज जोडणीचे बिल विना त्रुटी मंजूर करण्याच्या मोबदल्यात 2 लाख रुपयांची लाच घेताना महाराष्ट्र वीज वितरण कंपनीच्या धुळे येथील वित्त व लेखा विभागाच्या व्यवस्थापक व उप व्यवस्थापकास लाच लुचपत प्रतिबंधक विभागाने रंगेहाथ पकडले आहे.
या प्रकरणी लाचलुचपत प्रतिबंधक विभागाने व्यवस्थापक अमर अशोक खोबडे (वय 41, रा. जमनागिरी रोड, धुळे) व उप व्यवस्थापक मनोज अरुण पगार (वय 46, रा. विवेकानंद कॉलनी, चाळीसगाव) यांना लाच घेताना अटक केली आहे. याबाबत अधिक माहिती अशी की, तक्रारदार हे शासकीय नोंदणीकृत ठेकेदार आहेत. त्यांनी मराविवि कंपनी अंतर्गत जिल्हा नियोजन योजनेत धुळे मंडळ कार्यालय अंतर्गत वीज जोडणी संदर्भात 2018-19 या वर्षात ठेका घेऊन 56,31,590 रूपयांचे काम पूर्ण केले होते. त्या कामाच्या सादर केलेल्या बिलात त्रूटया न काढता सदर प्रलंबित बिल मंजूर करण्याच्या मोबदल्यात खोंडे व पगार यांनी तक्रारदाराकडे 5 लाख रुपये लाचेची मागणी केली. तडजोडी अंती अडीच लाख रुपयाची लाचेची मागणी निश्चित करून यापैकी पहिला हप्त्याच्या स्वरूपात 2 लाख रुपये खोंडे व पगार यांनी त्यांच्या केबिनमध्ये स्वीकारले. ही कारवाई ही कारवाई अधीक्षक शर्मिष्ठा वालावलकर, अपर पोलीस अधीक्षक नारायण न्याहाळदे, पोलीस उपअधीक्षक नरेंद्र पवार यांच्या मार्गदर्शनाखाली पोलीस उप अधीक्षक अनिल बडगुजर, पोलीस निरीक्षक प्रकाश झोडगे, शरद काटके, संतोष पावरा, भूषण खलाणेकर, भूषण शेटे,गायत्री पाटील, सुधीर मोरे, रामदास बारेला, मकरंद पाटील , प्रशांत बागुल, रोहिणी पवार, वनश्री बोरसे यांच्या पथकाने केली.
