गेल्या काही दिवसांपासून शहरात अघोषित भारनियमन सुरू असून, सातत्याने वेळी-अवेळी वीज पुरवठा खंडीत होत असल्याने नागरिक हैराण झाले असून मंगळवारी मनमाड शहर शिवसेनेतर्फे वीज वितरण कंपनीच्या उपविभागीय कार्यालयात ‘कंदील जलाव’ आंदोलन करण्यात आले. कार्यकारी अभियंत्यांच्या टेबलवर कंदील आणि मेणबत्ती लावून व प्रशासनाच्या विरोधात जोरदार घोषणाबाजी करत विविध मागण्यांचे निवेदन या वेळी देण्यात आले.
शिवसेना ठाकरे गटाचे उपजिल्हाप्रमुख तथा वीजग्राहक संघर्ष समितीचे अध्यक्ष संतोष बळीद यांच्या नेतृत्वाखाली सहसंपर्कप्रमुख प्रविण नाईक, जिल्हा समन्वयक सुनील पाटील, जिल्हा संघटक संजय कटारीया, तालुका संघटक संतोष जगताप, शहरप्रमुख माधव शेलार, तालुका उपप्रमुख अशोक पदमर आदी उपविभागीय कार्यालयात गेले असता कार्यकारी अभियंता अनुपस्थित होते. त्यांच्या टेबलवर कंदील आणि मेणबत्ती पेटवून निषेध नोंदवत अधिकाऱ्यांना निवेदन देण्यात आले, त्यात म्हटले आहे, की अनेक भागांत आठ तास वीजपुरवठा खंडीत होत आहे. अर्बन-२ मध्ये केव्हाही वीजपुरवठा खंडीत होतो. अधिकारी, लाईनमन वायरमन यांचे फोन बंद असतात. भोंगळ कारभारामुळे माहिती मिळत नाही. बील भरण्यास विलंब झाल्यास लगेच वीजपुरवठा खंडितकेला जातो. बिले कमी करण्यासाठी चकरा माराव्या लागतात. मीटर रिडींग न घेता भरमसाठ बिले दिली जातात. कोटेशन भरुनही वीज मीटरदिले जात नाही. अनेक वायरमन कर्मचाऱ्यांनी वीज बिलाचे रोख पैसे घेतले. मात्र, अद्याप विल भरले नाही, तांत्रिक अडचणींच्या नावाखाली अघोषित भारनियमन होत असल्यास तसे कळविणे गरजेचे आहे. वरिष्ठ अधिकाऱ्यांनी याची दखल घ्यावी, अन्यथा शिवसेना स्टाईल आंदोलन करावे लागेल, असा इशारा श्री. बळीद यांनी दिला आहे.
