मनमाड – १२ वीच्या महत्वपूर्ण वर्षातच घरावर कोसळलेल्या संकटाचा धीरोदत्तपणे सामना करत आणि घरची जबाबदारी समर्थपणे सांभाळत ओनस्वी राजेंद्र ताथेड हिने जिद्द आणि चिकाटीद्वारे विज्ञान शाखेतून मिळवलेले यश अनमोल असेच मानावे लागेल.
मनमाड शहरातील सामाजिक कार्यकर्ते राजेंद्र ताथेड यांची ओनस्वी ही कन्या. नुकत्याच जाहीर झालेल्या १२ वीच्या निकालात ओनस्वीला विज्ञान शाखेतून ६८.८३ टक्के यश गुण मिळाले. हे गुण दिसायला थोडेसे कमी वाटत असले तरी ज्या खडतर परिस्थितीतून तीने हे यश मिळवले ते पहाता या गुणांचे मोल कितीतरी अधिक ठरते ओनस्वी १२ वी ला गेली तोपर्यंत सारे काही आलबेल सुरू होते. मात्र २ एप्रिल २०२२ रोजी आनेस्वीच्या कुटुंबावर संकटाचा डोंगरच कोसळला. ओनस्वीची आई सौ. अरूणा ताथेड यांचे दोन्ही पाय
अचानक पॅरेलीस झाले. त्यांना तातडीने नासिकला दवाखान्यात नेण्यात आले. मात्र दोन्ही पाय कायमचे काढून टाकावे लागतील असे सांगण्यात आले. त्यांचा जीव वाचावा म्हणून राजेंद्र ताथेड यांनी या निर्णयाला संमती दिली. अवघ्या एका दिवसात ओनस्वीचे लाड करणारी काळजी घेणाऱ्या आईने अंथरूण धरले. महिनाभर हॉस्पीटलमध्ये ठेवून त्यांना नंतर घरी पाठविण्यात आले.
या परिस्थितीत घरातील जबाबदाऱ्या ओनस्वीवर येवून पडल्या. एका बाजूला आईची सेवा, येणा- जाणाऱ्या पाहुण्यांकडे लक्ष देणे. एक वेळचा स्वयंपाक, लहान भावाची काळजी, त्याचा अभ्यास आणि वडीलांनाही आधार देण्याचे काम तीने समर्थपणे केले. एवढे सर्व करून कॉलेज, क्लास नियमीतपणे सुरूच होते. अशा चहुबाजूंनी कोसळलेल्या संकटांमुळे एखाद्याने हार मानली असती. मात्र आनेस्वीने प्रचंड जिद्दीने आणि चिकाटीने या परिस्थितीशी मुकबाला केला. सर्व जबाबदाऱ्या समर्थपणे सांभाळतांना आणि चिकाटीने अभ्यास करून विज्ञान शाखेतून ६८.८३% गुण मिळवले आहेत. आयुष्याची पहिली लढाई तिने जिंकलेली आहे. ओनस्वी हिने सिध्दी क्लासेसमध्ये क्लास लावलेला होता.
“ओनस्वीच्या या साऱ्या संघर्षाचे आम्ही साक्षीदार आहोत. ज्या परिस्थितीत तीने हे यश मिळविले ते बहुमोल आहे. ओनस्वी तुझ्या जिद्दीला सलाम” अशी गहिवरलेली प्रतिक्रिया सिध्दी क्लासेसच्या संचालिका सौ. भाग्यश्री दराडे यांनी निकालानंतर व्यक्त केली.
