येथील महात्मा गांधी विद्यामंदिर संचलित, कला विज्ञान व वाणिज्य महाविद्यालय, मनमाड येथे दि . २१ जून हा जागतिक योग दिन राष्ट्रीय सेवा योजना, शारीरिक शिक्षण विभाग, राष्ट्रीय छात्र सेना यांच्या संयुक्त विद्यमाने आयोजित करण्यात आला. योगशास्त्राची निर्मिती प्राचीन काळापासून भारतात झाली. भारतीय संस्कृतीचे महत्त्व आणि महात्म्य योगातून समजले. योग केल्यामुळे शारीरिक व मानसिक स्वास्थ्य उत्तम राहते. तसेच आनंददायी जीवनासाठी नियमित योगासने करणे लाभदायक आहे, असे प्रतिपादन योगशिक्षिका स्वाती मुळे यांनी जागतिक योग दिनानिमित्त महाविद्यालयात योग प्रशिक्षण शिबिराच्या उद्घाटन प्रसंगी केले. योगाचे महत्त्व मा. पंतप्रधान नरेंद्र मोदी यांनी सन २०१४ मध्ये युनोत विषद केले. त्यानंतर जगातील बहुसंख्य राष्ट्रांनी योगाचा स्वीकार केला. दि. २१ जुन २०१५ पासून जागतिक योग दिन आंतरराष्ट्रीय पातळीवर साजरा केला जाऊ लागला . या अनुषंगाने महाविद्यालयाचे प्राचार्य डॉ. सुभाष निकम यांच्या मार्गदर्शनाखाली उपप्राचार्य डॉ. बी एस देसले , व्यवसाय शिक्षण विभागाचे उपप्राचार्य पी.के.बच्छाव, पर्यवेक्षक प्रा रोहित शिंदे,पर्यवेक्षक प्रा.विठ्ठल फंड, कुलसचिव श्री.समाधान केदारे यांच्या उपस्थितीत योग प्रशिक्षण वर्गाचे आयोजन करण्यात आले होते . या प्रशिक्षण शिबीरास योगशिक्षिका मा. स्वाती मुळे, सहशिक्षिका वर्षा मुळे व सार्थक महाले यांनी योगासनांची प्रात्यक्षिके करून मार्गदर्शन केले. कार्यक्रमाचे सूत्रसंचालन रासेयो कार्यक्रम अधिकारी डॉ.पी बी परदेशी प्रास्ताविक व आभार क्रीडा संचालक प्रा.सुहास वराडे यांनी केले.या कार्यक्रमाच्या यशस्वीतेसाठी लेफ्टनंट प्रा. प्रकाश बर्डे, क्रीडा संचालक प्रा. महेंद्र वानखेडे यांचे सहकार्य लाभले. या शिबिरात महाविद्यालयातील सर्व प्राध्यापक, शिक्षक, प्रशासकीय कर्मचारी तसेच राष्ट्रीय सेवा योजनेचे स्वयंसेवक व स्वयंसेविका , राष्ट्रीय छात्र सेनेचे कॅडेट व विद्यार्थी यांनी मोठ्या उत्साहात सहभाग घेतला.
